SANTA MARTA: Un mucha di apenas 5 aña di edad a perde su bida, despues cu un avion priva a pasa dal’e den area di Aeropuerto Simon Bolivar na Santa Marta, Colombia.
E accident na Aeropuerto a socede Diadomingo merdia ora cu un avion Cirrus Vision SF50 cu matricula KH5342 di e compania Helistar, tabata take off riba e pista, y pa motibonan cu ta bay wordo investiga, e avion a sali di pista y bay finaliza na e parti panort di e beach conoci como ‘Playa Dormida’.
E avion a dal finalmente contra un palo di mata na e beach, bao di cual un famia tabata buscando sombra. E cuatro personanan abordo a wordo rescata ileso door di Bombero di Aeropuerto. Pero a sali na cla cu e avion a dal y pasa riba algun hende cu tabata na e beach bao di un palo di mata, y nan a resulta herida. Nan a ser transporta pa Hospital eybanda.
Entre esnan herida tin un mucha muher den estado grave, como tambe su welga, y algun persona mas di mesun famia kendenan tabata na beach pa goza di un Diadomingo cu hopi solo.
Despues a bin drenta informacion, cu e mucha muher a perde su bida debi na e trauma y heridanan cu el a ricibi.
Bomberonan tabata vigila e situacion pa evita un posible derame di jetfuel den lama. E runway 01 di Aeropuerto, ta caba net unda cu tin un caminda ta pasa, y net su tras tin un pida beach, sigui pa lama.
E avion Cirrus Vision SF50 ta uno di un solo motor jet, y por transporta maximo 6 persona abordo, incluyendo e piloto. Esun accidenta Diadomingo, a lanta vuelo for di Santa Marta rumbo pa Bogota.
