Relaciona cu agresion di referee Bedoya:
ORANJESTAD (AAN): Arubaanse Voetbal Bond (AVB) a tuma nota di e sucedido cu a tuma lugar fin di siman caminda arbitro sr. Luis Bedoya a ser agredi seriamente na un torneo amistoso cu a wordo organisa door di Sv La Fama.
AVB kier expresa su sosten pa sr. Bedoya y manda deseo di pronto recuperacion.
Cuerpo di arbitro a acerca AVB Diadomingo 1 October pa expresa nan preocupacion cu e agresion cu ta escalando contra di oficialnan y a informa AVB di nan decision dificil di no fluit y un wega mas te ora mihor medidanan ser tuma pa mitiga agresion contra arbritronan.
AVB a suspende e weganan cu tabata programa pa Diadomingo 1 October te cu proximo aviso mirando cu refereenan a indica cu nan no lo traha door di e sucedido di diasabra pasa.
AVB ta trahando activamente pa un solucion. Mientras tanto, weganan no lo tuma lugar mientras ta den deliberacion. E meta ta pa por yega na otro mas liher cu ta posibel.
Den e caso aki, Recherche a detene e coach Neil Jansen di team U13 di La Fama. Tin indicacion cu e caso di maltrato ta asina serio cu referee Bedoya, kende ta hospitalisa, por te hasta perde su wowo despues di a wordo agredi cu un boter despues di e wega na Compleho Deportivo Frans Figaroa. Parce cu el a rabia pasobra durante wega vs. RCA su team a haya 2 carchi cora. RCA a gana e wega y despues el a bay discuti cu referee Bedoya cu e consecuencianan menciona, lagando e mal herida.
