Autoridadnan awor ta controla e ‘forma di bisti’ di Taxistanan tambe

DTP awor tin extra inspector den servicio

ORANJESTAD (AAN): E comportacion inaceptabel di 2 Taxista como dos siman pasa riba parkinglot di Aeropuerto, ta hayando su debido atencion di Departamento di DTP y tambe Ministro Ursell Arends.

   Que hubo di reclamonan cu por a nota ultimo tempo, di hendenan cu no ta di acuerdo cu e “dress code” di algun Taxista na Aruba.

   Ministro Ursell Arends riba esaki a indica cu e ‘dress code’, desde October 2022 caba Gobierno y DTP a introduci un maneho riba esaki, y diferente control ta wordo haci.  Siman pasa mes, DTP a pasa oranan largo ta haci control riba Taxistanan, y atende cu esnan cu no ta cumpli.  DTP pues ta atende esaki a base diario, cu e speransa cu Taxistanan lo por cuminsa bisti mihor pa ora nan atende cu turistanan.

   Segun Ministro, DTP ta un departamento cu falta trahador, y aworaki a caba di logra haya algun Inspector adicional, pa asina por yuda cu e proceso di ta mas activo, tene mas control na forma frecuente.  Segun Ministro Arends, tur esaki ya ta dunando resultado.

   Pero pa e asunto di sancion y comportamento di Taxistanan, por a nota cu riba Social Media un di e reclamonan mas grandi ta cu Taxistanan no ta traha anochi.  Pues den dia ta haya taxistanan na abundancia, pero den oranan di anochi esey no ta asina.

   “Mi mes a acerca algun di e Taxistanan pa puntra nan riba esaki,” Ministro Arends a indica.  Motibonan ta varia, y principalmente e parti di Highseason di Crusero na Aruba, cu ta pone Taxistanan traha mas frecuentemente den dia, y consecuencia ta cu anochi no ta haya tur ta labora.

   “Esaki ta algo cu mi ta desea di bay den dialogo cu e Taxistanan pa mira con por bay suavisa esaki,” Ministro Arends a enfatisa.  Pasobra tin total di 465 Taxi na Aruba, pero na final di dia tin di brinda servicio durante dia y anochi na e turistanan cu ta bishita e isla.  E titular di Transporte a indica cu esaki ta algo cu e ta desea pa por tin mihor palabracion cu nan, pa mira con por garantiza e calidad di servicio na bishitantenan.

   Ministro Arends a splica cu ya caba tin diferente rekesito mara na e Taxivergunning oficial, pero ta deliberando cu DTP pa mira si acaso ainda tin di bay pone punto- y reglanan adicional den e vergunnning, pa asina por mira con por canalisa e procesonan aki.  Tur esey cu e meta final pa reduci e tipo di actonan cu a socede (bringamento), y actitudnan cu ta sigui tuma lugar.  Pasobra nan por afecta turismo y economia di e isla, y esey ta absolutamente algo cu no kier mira tuma lugar.

   Pesey den e caso di bringadornan, a tuma paso pa revoca e rijvergunning, y ta mirando kico otro por haci cu e 2 taxistanan bringado.  E ta bira alavez un les pa tur otro taxista na Aruba.