Pediatra Dr. Eric Arends: Noah tabata un baby saludabel
ORANJESTAD (AAN): Dr. Eric Arends, pediatra cu a atende e caso di fayecimento di Baby Noah, a indica durante un conferencia di prensa diahuebs cu semper ora cu un mucha fayece, esaki ta algo hopi tragico, principalmente si ta trata di un mucha cu ta saludabel.
E profesionalnan medico semper ta purba di haya sa kico ta e causa di e fayecimento. Tin pashentnan cu tin problemanan cronico of cu a nace cu algun defecto of cu a desaroya cierto malesanan durante nan bida.
Pesey poco poco por wak cu nan ta bay atras y cu por yega un momento cu nan ta fayece. Pero un mucha cu ta totalmente saludabel, cu ta fayece di un manera asina, hopi biaha, ta reuni cu e mayornan y ta pidi un autopsia tambe pa determina kico tabata causa di morto, e medico a splica.
Cu permiso di e mayornan di baby Noah, el a comparti locual ta e resultadonan di e autopsia. En general, e patologo cu ta esun cu ta haci e autopsia ta wak e parti di pafo, si tin algun caracteristica of malformacion cu el a nace cu ne (malesa congenital).
Den e caso di Noah, e tabata un baby sano y externamente no a wak nada particular of cu por a mustra cu tabata tin algo cu no tabata bon cu ne pa cu su salud, a señala.
E di dos parti di e autopsia, wak e parti interno di e pashent y via microscopico ta visualisa e diferente organonan y pa haci esey ta tuma cierto partinan di e organonan pa analisa nan microscopicamente pa wak si tin cierto indicacion di un problema of un malesa di un of mas organo, Dr. Arends a señala.
Den e trachea, a wak un substancia blanco cu ta restonan di lechi. A examina e curason y esaki a mustra normal. Den stoma tambe a wak e mesun substancia blanco cu a wak den e trachea. E niernan tabata un tiki congestiona, pero esey ta sosode hopi biaha ora un pashent ta bay den shock pa falta di circulacion. E pancreas ni higra a mustra nada particular. Stoma, tripanan y e parti digestivo tampoco no tabata mustra nada particular, a indica.
El a agrega cu den e conclusion di e patologo, e ta menciona cu seguramente ta un forma di aspiracion a tuma lugar cu cuminda of lechi a finalisa den e trachea di Noah, locual no mester ta e caso. Esey a ocasiona asfixia (falta di oxigeno) cu na cierto momento ta causa cu e curason tambe ta stop di traha.
Tempo cu Noah a nace a haci un control cardiaco y tur test a sali normal. E palpitacion tiki acelera di curason ta algo cu ta wak normalmente den cierto mucha, pero ni e presencia di extra 'hartoverslagen' no ta causa un problema severo cu ta causa un paro cardiaco.
Dr. Arends a finalisa bisando cu Noah tabata un baby saludabel y medicamente no tabata tin un splicacion pakico e por a fayece na un manera inespera asina.
