Hose Figaroa Presidente di FTA:
*Mester tin criteria pa importa trahado!
ORANJESTAD (AAN) —Presidente di Sindicato FTA, Hose Figaroa, a sigui bisa den entrevista cu DIARIO encuanto scarcedad di trahado den sector turistico na Aruba, cu di otro banda bo mester tene cuenta si, cu bo no por importa hende di afo, pa loco tampoco.
“Pues, na cierto momento bo mester tin bo criterianan, y esey nos a papia tambe, tempo cu nos a forma parti di e Comisionnan cu ta discuti asunto aki. Den pasado a importa hende sin tene cuenta cu edad. Pero na momento cu bo ta importa un trahado cu su edad ta mas halto, e temporada cu e ta bay ta den e mercado laboral ta bay ta mas cortico y na momento cu e yega su edad di pensioen e tin derecho riba un AOV, no mas cu door cu e no a biba na Aruba hopi tempo, e AOV ta hopi reduci, locual na su turno e ta crea otro problema. Problema social, e ora ey”, Figaroa a reitera.
El a subraya cu e persona aki tin cu bay biba cu un suma di 300 pa 400 florin pa luna, locual ta imposible y esey ta pasando aworaki.
“E trahadornan cu a bin pa yuda e economia di Aruba den añanan 80 cu 90, aworaki ta yegando edad di pensioen y aworaki ta hayando pensioennan cu ta hopi recorda, cu ta hopi menos cu loke ta suppose di ta”, Figaroa a remarca.
El a reitera cu mester tin hopi criterio pa den futuro no ripiti esaki y aki 20-25 aña nos ta haya cu e mesun problema aki.
Pues mester tin criteria di ki tipo di trahado ta bay importa, por ehemplo edad, si ta pareha, locual riba su mes tambe tabata tin antes, unda e maneho tabata cu no tur dos ta haya permiso. “Pero si bo pens’e un pareha cu ta bin traha nan ta bay biba bao un solo dak y e ta cumbini, en todo caso tambe pa e infrastructura, pasobra mester tin menos espacio pa e pareha bay biba. Pues e criterio ey ta mas importante y na e momentonan aki, no dje tanto ey loke ta trata e toots di e mercado laboral, ta duidelijk cu tin escasez di trahado y eynan mi ta kere mester por flexibiliza un poco e toots ey of agiliza un poco y no tarda lunanan largo prome cu bin un resultado positivo.
