Experto di FIG cu a duna curso pa FGA ta hopi honra di a bin Aruba:
ORANJESTAD (AAN) – E experto di e Federacion Internacional di Gimnasia (FIG), señor Marco Bortoleto, tabata di bishita na Aruba siman pasa, pa dirigi e curso Fundamentonan di Gimnasia, invita pa e Federacion Gymnastico Arubano (FGA). Bortoleto ta original di Brasil, y e ta specialista den “Gimnasia para todos”.
Den conferencia di prensa Diabierna cu a pasa e tambe a hiba palabra. El a expresa cu tabata un placer enorme ta na Aruba y a subraya cu e curso aki ta mustra e esfuerzo cu e federacion internacional ta haci pa amplia y haci mas difusion di e conocemento.
“Aunke Aruba ta un Isla chikito e tin e mesun grado di importancia cu cualkier otro pais, y bin Aruba ta nifica cu e Federacion Internacional tambe ta observando, acompañando y intentando promove e desaroyo di tur su federacionnan miembro, cu ta den nan desaroyo interno.
“E ta un placer enorme cu e entrenadornan di Aruba, pero tambe di paisnan cercano a haya oportunidad di intercambia, siña y ohala construi relacionnan cu por yuda den cada un di nan paisnan, un mayor desaroyo y ademas sostenible, di gimnasia. E curso aki ta uno cu ta permiti habri portanan, pa un pensamento mas amplio tocante e gimnasia, y con por transforma, efectivamente, e gimnasia den un deporte masivo cu un participacion mas amplio di e poblacion y mi ta kere cu e Federacion di Gimnasia di Aruba cu e colaboracion di e Federacion Panamericano, a duna un paso hopi importante den e direccion aki, di promociona e gimnasia, amplia su oportunidadnan y ohala mehora e resultado den e competencianan den futuro. Por lo tanto ta un placer enorme, tanto pa mi persona y mi compañeronan experto cu a bin y nos ta hopi satisfecho cu e resultado. Nos por a traha den un gimnasio cu realmente ta basta bon y a ofrece nos condicionnan di trabao basta bon, y nos ta spera cu e Federacion ta contento y por, di algun manera, utiliza e conocemento aki pa amplia y mehora gimnasia den boso pais”, Bortoleto a conclui.
