Mientras calor ta exigi mas uzo di electricidad na Aruba
- Belasting internacional y un Canal di Panama na peliger
- Mester vigila costo di bida na Aruba den situacion mundial
ORANJESTAD (AAN) - E union di produccion di mas calor dor di cambio di clima y e prijs di energia cu lo subi, ta un problema serio mundialmente, pues tambe na Aruba.
Costo di transportacion lo subi cu aumento di costo di gasolin, cu ayera mundialmente a conoce instabilidad, cu prijsnan cu a sigui colga entre 80 y casi 90 Dollar pa baril, cu ta un aumento serio compara cu fin di 2022.
Prijs di petroleo, segun tur informacion, lo afecta e publico sin duda cu aumento di prijs di transportacion, pero esaki lo no ta culminacion di problema.
Manera DIARIO a informa algun siman pasa, mas cu 20 pais na mundo a bay di acuerdo pa bini cu un tipo di belasting special pa trafico maritimo den cuadro di cambio di clima.
Segun informantenan e pensamento di e paisnan ta, cu asina ta exigi barconan pa adapta nan mes na reglanan ambiental cu ta exigi pa barconan baha e peliger ambiental cu nan ta forma cu e contaminacion ambiental.
Con serio e problema di medio ambiente mundial ta, ta wordo ilustra na Canal di Panama cu ta ta den un problema financiero.
E pasashi di un oceano pa otro cu hende a crea pa trafico maritimo entre Oceano Pacifico y Oceano Atlantico ta na peliger.
Ya medidanan a wordo tuma mientras perdida grandi ta wordo registra na e canal cu ta duna testimonio na mundo di e problema serio di secura y falta di yobida pa Panama y su canal.
Ayera na ciere di e edicion di awe, informantenan clave a splica DIARIO cu e instabilidad grandi produci pa prijs di petroleo actualmente, ta algo sumamente serio cu lo afecta prijs di petroleo na e momento cu calor ta crea mas necesidad cu nunca pa mas uzo di coriente.
E calor intenso cu ta wordo registra na Aruba tambe, ta subi costo di bida enormente pasobra e ta exigi mas uzo di sistemanan pa airconditioning cu ta forma un peso extra pa casnan di familia y pa negoshinan, cu mester hinca e gastonan adicional den nan prijs.
Na e momento cu paisnan introduci un belasting pa trafico maritimo, cu ta percura pa e gran mayoria di transportacion di carga, pues di mercancia, nan ta afecta prijsnan mundial y di e forma aki tambe e peso di aumento di prijsnan na Aruba.
DIARIO ta den contacto cu informantenan internacional y local y por constata preocupacion sumamente serio pa e forma cu instabilidad den sector di petroleo ta afecta mundo.
Trafico maritimo na e momentonan aki ta confronta gastonan enorme si barconan mester wordo adapta na reglanan nobo. Pues hasta si no tene un belasting nobo pa clima pa barconan na consideracion, mester considera e gastonan pa adaptacion na reglanan nobo di emision, di e resultado di uzo di combustibel pisa.
E peso di costo di bida na Aruba mester wordo vigila di acerca segun informantenan cu a mustra cu e condicionan di clima ta exigi mas uzo di transportacion. E ta afecta e tendencia pa uzo airconditioning den vehiculo y na cas.
Manera a wordo indica na DIARIO, ta sumamente peligroso pa personanan cu no ta soporta calor, wordo expone na situacionnan calor cu ta wordo considera un asesino silencioso den mundo medico.
DIARIO ta siguiendo tur informacion na nivel local y internacional, na momentonan sumamente dificil na nivel mundial pa asina informa su lectornan debidamente.
