Aumento di vuelo di aerolinea Wingo ta bay hisa “airlift” di Latinoamerica pa Aruba

ORANJESTAD (AAN): Den cuadro di diversificacion Minister di Turismo y Salud Publico sr. Dangui Oduber ta comparti cu e aerolinea Wingo ta aumenta nan vuelonan pa Aruba.

Wingo ta operando 2 vuelo semanal for di Medellin, Colombia desde 1 di oktober. Wingo ya caba pa un algun aña ta operando cu nan ruta directo for di Bogota.

E vuelo for di Medellin lo ta 2 biaha pa siman riba diaranson y diasabra, Wingo ya ta operando 3 vuelo semanal riba diamars, diahuebs y diadomingo. Awor Wingo tin total di 5 vuelo semanal pa Aruba cu nan ta opera cu nan avion Boeing 737-800 cu tin un capasidad di 186 asiento.

   Minister Dangui Oduber ta satisfecho con Aruba su turismo ta desaroyando, e di tres kwartal ta bayendo hopi bon caminda Aruba a recupera 94% di nos turismo. Tur indicacion ta mustra cu e ultimo kwartal ta bira uno hopi prometedor caminda Aruba por yega 100% di recuperacion di nos turismo den comparacion cu aña 2019. E aumento di vuelo di Wingo ta bay haci cu lo bay tin un aumento den e “airlift” di Latino America pa Aruba.

   Diversificacion di nos turismo ta keda parti di e strategia y cu e vuelo adicional aki minister Oduber ta cumpliendo cu esaki.

   Minister Dangui Oduber a duna di conoce cu diversificacion di rutanan den latino America ta cuadra cu e maneho di Gobierno. Minister Oduber ta hopi satisfecho cu e trabou cu e airlift committee ta haciendo. Ban sigui avansa hunto como pais pa como pais nos yega y pasa e 100 porciento di recuperacion di nos turismo compara cu aña 2019.