Herrick Henriquez, president di ATIA:
ORANJESTAD (AAN): E tema di Rijkswet HOFA den e ultimo lunanan ta bira mas interesante y ta hayando mas atencion di varios sector na Aruba. Gobierno, Fraccionnan den Parlamento, Sindicatonan entre otro ta riba e tema aki, mientras cu sea ta duna of busca informacionnan si HOFA tin beneficio of no pa Aruba.
Señor Herrick Henriquez, Presidente di ATIA den entrevista cu DIARIO a remarca cu ATIA a saca algun declaracion di e benficionan di un rijkswet. El a duna di conoce cu ATIA ta sostene supervision financiero remarcando cu supervision mester ta algo temporal. El a agrega cu Aruba mester por yega na e metanan financiero pa paga debe y no por keda fia so.
Tocante e documento cu actualmente ta riba mesa si e ta e version final of no, señor Henriquez a remarca cu Parlamento mester yega na un documento final na unda ta haya aprobacion di mayoria pa mustra Hulanda cu esaki ta loke Aruba kier. “Awo ta e ora cu tur mester para hunto pa un miho futuro pa Aruba pasobra na final ta pueblo ta bay paga. ATIA semper a para pa colaboracion y ta boga pa Gobierno tuma e miho decision posibel pa e pueblo y pa comercio pasobra ta nos ta bay pag’e pa nan ehecut’e”, señor Herrick Henriquez a duna di conoce.
