ORANJESTAD (AAN): Aruba Trade & Industry Association (ATIA) ta sigui celebra su 80 aniversario cu un evento historico: EXPO ATIA 2025.
E expo empresarial y di empleo mas grandi di Aruba lo tuma luga dia 14 y 15 november 2025 y ta destina pa bira un plataforma unico pa conecta comerciante, studiante y esnan cu ta buscando oportunidad pa empleo.
“EXPO ATIA ta un iniciativa cu a manifesta ultimo añanan, unda ATIA ta mira cu mester bin cu un ‘trade show’, dunando comerciantenan un plataforma pa presenta nan producto y servicio. ATIA a pone e concepto na prueba caba durante nos corporate event na 2023, Now is The Future. E aña aki, en conexion cu ATIA su di 80 aniversario, nos a dicidi pa amplia e concepto aki pa uno mas grandi,” Director di ATIA, Herrick Henriquez a menciona.
Durante e lansamento oficial di EXPO ATIA na oficina di ATIA, Henriquez a splica cu e evento ta premira di tin alrededor di 50 compania representando tur sector. Adicionalmente, EXPO ATIA lo brinda oportunidad pa comerciante conecta directamente cu studiante y nos talentonan profesional. Tambe lo tin charla y sesionnan educativo cu expertonan local riba diferente topico cu ta relevante pa eleva bo carera of bo empresa. E di dos dia di EXPO ATIA lo culmina cu ATIA su conocido evento di ACE (Annual Corporate Event), e evento di networking mas grandi na Aruba pa esnan cu kier conecta cu comerciantenan local den un ambiente mas social.
ATIA ta presenta un concepto y espacio dinamico unda participantenan, no solamente por conecta cu otro empresa pa asina cera alianza, pero tambe busca oportunidad laboral, y ricibi informacion di diferente trayecto di carera. Tur esaki ta e vision di ATIA pa progresa nos economia y eleva Aruba su futuro. Tambe e evento ta den alinea cu Metanan di Desaroyo Sostenibel (SDG) promoviendo trabou digno, innovacion, educacion di calidad, y colaboracion.
ATIA como e bos di comercio pa 80 aña ta sigui cu esfuersonan pa pone Aruba riba un caminda di crecemento, innovacion y union empresarial.
