ATHA cu iniciativa di coordina charla pa hoben duna pa Shon Pe Krozendijk

Franchesca Heinze ta relata:

ORANJESTAD (AAN) – Franchesca Heinze, trahado boluntario na Asociacion Trabao pa Hubentud Aruba (ATHA), a duna su opinion tocante e charla cu Shon Pe Krozendijk tabata tin pa un grupo di hoben, esta “Hey hoben”.

E idea original ta di su colega Elba Angela, cu den un reunion di ATHA a mustra su preocupacion pa e hobennan eyfo. Mayornan tambe ta preocupa cu e actitud di e hobennan y ora el a wak riba facebook cu Shon Pe ta ofrece un charla titula: “Siña para riba bo pia, pa bo no bay KIA” di biaha, como ATHA, nan a organiza e charla pa hoben.

Heinze a duna di conoce cu Shon Pe a pasa videonan di e realidad, vooral di e consecuencia ora cu e hobennan ta tuma cierto decisionnan of erornan, cu tin biaha nan mes no sa cu no mag.

Nan no ta para keto tin biaha, na e hecho cu si nan menaza un persona, nan por bay cera. Nan ta pensa cu e ta algo comun y cu no tin consecuencia.

E dama a informa cu nan tin un otro fecha poni, cu ta 2 di Juli unda adulto, mayor, educador por tey na luga di e hoben. E ora ey lo habri e vloer pa nan comunica kico ta pasando den veld di nan como ciudadano, mayor, etc.

Nan ta enfocando un tiki mas pabao di brug, como cu nan lo bay tin otro fecha tambe cu ta dia 7 di Juli, pa hacie pa hobennan pariba di brug.

Tambe tin e fecha 24 di Juni cu nan ta bayendo Scol Caiquetio, na Cura Cabay. Nan mes lo yega na e scol hunto cu Shon Pe, pa presenta kico ta ATHA y kico e ta para pe, kico ta e programanan cu ATHA tin pa hoben, dirigi na alumnonan di scol secundario, y seguidamente nan ta bay cu e charla di Shon Pe Krozendijk.  ATHA ta enfocando pa hoben den edad di 12-17 aña.