Luanne Gomez-Pieters, Director DIMP:
ORANJESTAD (AAN)-- Señora Luenne Gomez-Pieters, director di Departamento di Impuesto (DIMP), den conferencia di prensa a señala cu, segun nan ta digitaliza, nan ta constata cu mundo mas y mas ta digitaliza.
Den esaki, DIMP mester atende tambe cu normanan di cyber security. “Data security ta un punto hopi importante riba agenda di Departamento di Impuesto, no solamente pa nos riba nos agenda, pero nos ta wordo asesora tambe riba ki normanan nos ta set-up nos sistemanan”, Gomez-Pieters a indica.
El a splica cu DIMP ta uza un sistema standard pa proteha nan datanan y tambe tin sistemanan “in place” cu ta yuda nan monitorea nan sistemanan 24/7.
“E ta hopi importante. Di con? Pasobra antes un contribuyente tabata entrega su informacion cu datonan den nos sistema, anto e ta pusha informacion y su declaracion den nos sistemanan y nos ta asesora informacion y nos ta pone un cobranza. Anto, si e cliente, contribuyente a entrega su informacion laat, e ta haya un boet. Aworaki, entrante dialuna, e contribuyente ta saca informacion cu nos tin den nos sistemanan, y e ta mira tambe con e ta registra den nos sistema digital, e por mira su adres, y tambe su cuenta di banco. Tin hopi hende ta yama bisa cu nan ta wardando nan restitucion, pero DIMP ta wak cu e cuenta di banco di e contribuyente no ta registra cerca nan, of el a cambia di banco y no a registra e cuenta di banco corecto.
Pues, e contribuyente, mescos cu cualkier otro portal manera Setar of Elmar cu tin nan portal, nos tambe tin nos portal, unda e contribuyente ta drenta den su account y wak cu estado di cuenta”, Director di DIMP a remarca.
