Ronella Croes, CEO:
*Pa añanan caba e ta aportando na e limpieza di Aruba
ORANJESTAD (AAN) – Ronella Croes, CEO di Aruba Tourism Authority (ATA), a hiba palabra den conferencia di prensa, tocante rol cu ATA ta hunga den e Campaña Nacional 'Limpi Limpi'.
Ronella Croes a señala cu un campaña asina ta importante pa ATA y pa nos turismo, y un di aspectonan cu ATA ta pone acento riba dje ta di por provee un experiencia inolvidable pa nos bishitantenan loke ta nifica cu ATA ta para tambe pa salvaguardia un calidad di bida halto pa nos mes comunidad tambe.
El a agrega cu e parti di biba den un Aruba limpi, ta importante pa nos bishitantenan y tambe pa nos comunidad y pesey ATA, pa añanan caba tin diferente accion cu ta enfoca riba e limpieza di nos pais, esaki ta haci por ehemplo, door di coloca diferente bari di sushi rond di e isla, unda cu no solamente ta permiti e usuarionan haci uso di nan, pero tambe ta stimula separacion di sushi.
Por pensa riba barinan di sushi cu ta situa den diferente area unda nos playanan ta, y ta pidi e usuarionan pa separa plastic, aluminio, for di e otro sushinan restante.
“Nos por bisa cu e usuarionan, por lo general, ta respeta esaki pero mester di mas concientizacion riba e area aki. Pues, cu esey tambe nos ta uni nos mes na e campaña aki, no solamente pa explora con nos ta bay coloca mas bari di sushi, cu ta un di e peticionnan cu nos tin, y sigur nos ta wak esaki debidamente, pero tambe pa nos stimula separacion di sushi”, CEO di ATA a reitera.
Ronella Croes a splica cu e sushi cu tin aworaki ta wordo colecta pa door di Metabolic Foundation, kende ta recicla e plastic y ta entrega e resto di material na otro instancianan cu por haci algo cu e restante di e sushi respectivo.
Banda di esey ATA lo evalua con nan por amplia e concientizacion bao di nos comunidad y pa esaki tambe ATA lo brinda su plataformanan, pa asina informa e comunidad y e bishitante tocante tur loke ta Aruba su maneho stimulando nan pa tene Aruba limpi y haci Aruba limpi na unda e ta sushi.
