Ronella Croes, CEO di ATA a splica:
ORANJESTAD (AAN) – Limpieza di Aruba su beachnan ta algo cu no ta regarda hende local so, pero tambe na nos bishitantenan, y ATA tin un programa pa comunica cu e turistanan cu yama “My Promise” pa haci nan conciente, entre otro, di Aruba su regulacionnan, norma y balornan.
Ronella Croes, CEO di Oficina di Turismo, a declara den entrevista cu DIARIO, cu mester pensa bon tambe cu Turismo ta Aruba su pilar, y turismo ta encera movecion di hende.
“Pero realidad ta cu Aruba, awendia, ta ricibi mas of menos un dos miyon bishitante si combina e parti cu ta bin cu avion y e parti di turismo crusero. Esey ta hopi movecion di hende y esey tin hopi impacto. Kico ATA ta haci den esaki? Naturalmente ATA ta comunica cu e turistanan tambe. Con nos ta haci esaki? Nos tin un programa cu nos a lanza algun aña pasa, cu nos ta yama ‘My Promise’ y nos ta haci nan conciente, prome cu nan bin Aruba, di e importancia di cumpli cu regulacionnan; pero no solamente esey: kico ta nos norma y balornan como Arubiano y kico nos ta spera di nan, pa nan por yuda nos cuida e isla aki, cu nan por regresa y bishita y haci uso di dje tambe pa nan mesun felicidad y trankilidad”, Ronella a indica.
El a agrega cu pa casualidad, aworaki ATA ta cambiando e programa aki, y ta re-lansando un edicion nobo e aña aki.
“Esey ta uno, pero ATA a dicidi cu nos ta bay incorpora mas den nos comunicacion internacional tambe cu mensahenan cu ta para pa e propositonan aki. Pues, un Aruba cu ta bin dilanti, reflehando e importancia di cuido di nos medio ambiente, nos naturaleza, pues norma y balornan cu no ta solamente importante pa nos, pero cu ta resona tambe mundialmente y cerca esnan cu ta mira e importancia den esaki tambe” Ronella Croes a remarca.
Directora di ATA a subraya cu claro, nan comportacion lo refleha tambe den un respet mas grandi y un yudanza di nan banda, pa cuida pero ademas regresa, lagando un Aruba kizas miho, cu nan a haya mes. “Esakinan ta ehempelnan di cosnan cu nos ta haci y otro aspecto hopi importante ta cu recientemente, nos a cera un acuerdo strategico cu Aruba Conservation Foundation (antes PNA) pero e acuerdo aki tambe ta encera cu, netamente, ta bay tin mas esfuerzo dirigi na informa e bishitante y tur usuario di nos parkenan y tambe areanan critico pafo di nos parkenan, anto ta bay mira mas borchi, mas informacion, etc. etc”, Ronella Croes, directora di ATA a conclui.
