ATA ta boga pa Prome Minister dirigi un Comision Turismo 2030 y cada ministerio forma parti di dje 

Ronella Croes, CEO di ATA:

• ATA a entrega caba un documento di discusion cu 16 punto di prioridad 

ORANJESTAD (AAN) Directora di Oficina di Turismo di Aruba (ATA), Ronella Croes, den entrevista cu DIARIO a menciona, cu pa algun aña caba ATA tin un Comision cu a wordo instala door di Minister di Turismo, señor Oduber, yama “Infra-Committee” cu ta trata cu aspectonan infrastructural relaciona cu turismo.

   E Comision aki ta consisti di ATA, DOW, DNM, y Ministerio di Turismo. “Pues, hopi aspecto infrastructural, naturalmente, cu ta hopi cerca di e Industria Turistico, ta wordo papia eynan. No ta trata solamente di proyectonan cu ta conta riba inversion pa medio di, entre otro, ATA y TPEF (Tourism Product Enhacement Fund) cu tambe ta forma parti di e comision aki, of Gobierno di Aruba, pero otro aspectonan infrastructural, ta cosnan cu tin biaha ta wordo dialoga den e Comision aki. Pues, tin hopi atencion riba e aspecto infrastructural”, Ronella Croes a declara.

   El a expresa cu por ta, tin enberdad reclamonan aki aya, pero en general e bishitantenan cu ta bin Aruba ta sigui ta satisfecho.

   “Pero nos mes, mester keda ta autocritico. Nos tin cu bay eleva e calidad di diferente manera, pa haci esaki y nos tin cu ta conciente tambe cu na dado momento nos no por bay keda cu mas ingreso, pa medio di incrementa volumen di bishitante”, CEO di ATA a señala.

   El a subraya cu mester saca mas afo, manteniendo e volumen y cantidad di hende cu ta bishita nos. “Di nos banda e mensahe ta pa esaki ta stabil. Pues, stabiliza esey, eleva bo producto y cu esaki ta bin tur e aspectonan infrastructural”, Ronella Croes a indica.

   El a sigui bisa cu ATA a sinta cu Formadornan dia 21 di Februari, y a entrega nan un documento di discusion, cual ta papia di “Turismo 2030, Aruba dushi pa biba y bishita” y eynan a hunta mas of menos 16 punto di prioridad.

   “Pero manera mi a indica anteriormente tambe, nos como ATA a traha y inverti hopi den nos conocemento, pero tambe sigur pa asegura pa hopi di e trabao a wordo haci, p’asina nos por discuti cu e gobierno cu ta bay sinta, kico ta e accionnan concreto cu mester tuma, riba e parti di infrastructura, husticia, educacion, etc., etc.“

   “Nos a boga pa esaki wordo maneha diferente, unda Minister Presidente presidi un Comision Turismo 2030 y asina cada ministerio por ta un parti di e Comision aki, hunto cu ATA, y pa nos bay dirigi nos mes riba tur e accionnan cu nos a delinea cu ta importante manera mi a indica ta mas of menos 16 Punto di prioridad”, CEO di ATA, Ronella Croes a remarca.