ATA reconoci como e miho Oficina di Turismo na Hulanda pa di tres aña consecutivo

ATA Europa a triunfa na Vakantie Awards 2024

ORANJESTAD (AAN): Aruba Tourism Authority (A.T.A.) un biaha mas a demostra su excelencia den e industria di biahe cu logro  prestigioso di e miho oficina di turismo durante di Vakantie Award 2024. Un evento di Reisgala cu a tuma lugar na Hart van Holland, Nijkerk dia 27 di januari 2024 ultimo. Esaki ta bira e di tres biaha cu e oficina di turismo di Europa ta worde reconoci durante ceremonia di premiacion conoci como e 'Oscars' di e industria di biahe na Hulanda.

   E Vakantie Awards, reconoci como e ‘B2B brancheprijzen’, ta un testimonio di e actuacion destaca di profesionalnan den e industria. E triunfo di Aruba Tourism Authority ta resalta añanan di dedicacion firme, trabao duru, y un compromiso pa promove Aruba como un tremendo destino di biahe.

   Tirso Tromp, Director di A.T.A. Europa, ta expresa su gratitud: "Nos ta hopi entusiasma di ricibi e Vakantie Award pa miho oficina di turismo pa di tres aña consecutivo. E reconocimento aki ta un testimonio di e esfuersonan increibel di nos ekipo y e sosten di nos colaboradonan. E bunitesa di Aruba no ta limita na su playanan; e ta un refleho di e pasion y compromiso cu nos tin pa promove nos isla como un destino di biahe di clase mundial."

   Riba e mesun anochi, Aaliyah Windster, Sales Executive di A.T.A. Europa ta worde honra cu e Vakantie Award pa Talento di Aña 2024. Den un solo aña, Aaliyah a bira un strea briyante pa Aruba den e industria di biahe, demostrando entusiasmo, dedicacion, creatividad, y cariño remarcabel pa e marca di Aruba.

   Ronella Croes ta extende su felicitacion; “E ta yena nos cu hopi orguyo di por mira nos team logra un otro victoria grandi pa Aruba. Oficina di turismo di A.T.A. na Europa un biaha mas a sa di resalta entre lidernan grandi den e mercado di biahe. Pabien na e team completo di A.T.A. cu a colabora na e triunfo exitoso.”

   E reconocimento na Vakantie Awards 2024 ta reafirma e compromiso di A.T.A. cu excelencia den innovacion pa promove Aruba como un tremendo destino di biahe. Ademas ta ilustra e individuonan remarcabel cu ta contribui pa haci Aruba un experiencia inolvidabel pa biaheronan.