Asociacion Amigos de Colombia ta invita comunidad completo pa disfruta di 'Concierto di Integracion'

ORANJESTAD (AAN): Presidente di Asociacion Amigos de Colombia, Moises Fernandez a elabora cu dia 20 di Juli ta celebracion di 213 aña di Independencia di Colombia

y como asociacion a dicidi di organiza un 'Concierto di Integracion' riba diabierna 21 di Juli.

Fernandez a splica cu e evento ta pa comunidad di Aruba completo. Nan ta invita tanto localnan como tambe tur otro nacionalidad pa ta presente riba Plaza del Agradecimiento (na altura di T-weg dilanti di Brandweer).

Fuera di celebra e di 213 aña di Independencia di Colombia, nan a cuminsa bek cu un proyecto conoci como 'Cas di Colombia na Aruba' y tur fondo genera durante e concierto, como tambe otro actividadnan cu ta na caminda, tanto di e aña aki y otro aña ta bay keda completamente dedica na e proyecto.

Fernandez a indica cu comunidad Colombiano ta hopi grandi na Aruba, segun cifranan tin alrededor di 22 mil Colombiano na Aruba. E ta pidi pa e comunidad aki pa bin celebra cu nan y alaves aporta na e proyecto. Sigur e ta invita comunidad completo pasobra semper nan ta cla pa yuda otro comunidadnan.

Entrada pa evento ta gratis, y ta cuminsa di 8'or di anochi te cu 1'or di marduga y sigur cu bar y cuminda lo ta bon surti. Dos orkesta lo entretene esnan presente.

Fernandez ta splica cu e meta di Cas di Colombia ta pa brinda ayudo social na comunidad, en principio na comunidad Colombiano, pero e asociacion ta yama 'Amigos de Colombia', kiermen tur nacionalidad lo ta bon bini. Un di e proyecto cu nan ta trahando riba dje, ta pa e mamanan soltero cu ta traha por hiba nan yiu durante nan oranan di trabao pa duna nan un alivio y no mester paga pa cuido di nan yiu.