Presidente di Parlamento, Edgar Vrolijk:
ORANJESTAD (AAN): Presidente di Parlamento, Edgar Vrolijk, a duna di conoce den entrevista cu DIARIO cu tin dos peticion. Un a drenta di Prome Minister Evelyn Wever-Croes unda e ta pidi un reunion tocante e 'financieel toezicht' y locual ta e conflicto cu tin aworaki den Reino.
Vrolijk a sigui bisa cu tambe a drenta un peticion di Fraccion di MAS y Accion21.
Mirando cu ta den reces ainda, y door cu nan a pidi'e urgentemente, a opta pa pone riba agenda y asina e reces caba, lo atende cu esey den un reunion publico.
"Y pa tene tur banda contento mi ta haci un peticion comun, kiermen di Minister President y tambe di e fraccionnan", a bisa.
Tin espacio pa e reunion aki tuma lugar. No tin mucho trabao aworaki. No tin leynan pendiente. E unico ta e presupuesto supletorio y esey lo bin despues di 1 di September. E siman siguiente lo pone riba agenda e presupuesto supletorio mitad aña, e presidente di Parlamento a indica.
A remarca cu aworaki tur cos ta na ordo. No tin ningun ley pendiente, solamente e supletorio cual a cana su proceso y no ta cla ainda pasobra ta pa despues di 1 di September ya cu ainda e NAAV (Nota naar Aanleiding van het Verslag) nota riba indicacion di e relato no a drenta.
Unabes cu esey drenta, e lo ta cla, a expresa.
