Asina militarnan a cuminza cu nan entrenamento intensivo

‘Selectiedagen’ prome cu training VVO

ORANJESTAD (AAN): E luna aki, e militarnan Arubiano y Curasoleño a cuminza cu nan asina yama ‘Voortgezette Vakopleiding’ (VVO), cu ta un training intensivo di 24 siman, unda nan ta prepara pa nan siguiente paso den Defensa, como lider.

   Pero prome cu e training a cuminza, nan tin di demostra nan mes prome!  Asina a organiza un asina yama ‘Selectiedagen’, e soldatnan a participa den pruebanan deportivo, test di landamento, y un prueba di por traha cu mapa y compas tambe.  Solamente esnan cu ta firme den nan zapato, por a sigui bay dilanti cu e training.

   Den e training di VVO, nan limitenan lo wordo pusha atrobe.  No djis fisicamente, pero tambe mentalmente, cu enfoke riba liderato, planning, y actua bao presion.