Asina Fase 1 dilanti Highrise Hotelnan a keda y awor ta start cu Fase 2

ORANJESTAD (AAN): E trabaonan di renobacion di Irausquin Boulevard, cu ta e caminda dilanti Highrise Hotelnan na Palm Beach,

ta moviendo basta bon. Manera DIARIO a indica, cu e Contratista no a confronta ningun obstaculo inespera durante e trabao di Fase 1.  Esey ta e area net dilanti RIU Palace Antillas Hotel, y tambe RIU Palace Hotel (ex-Sheraton).

   Diaranson siman pasa e Contratista a pone e prome capa, y Diabierna a pone e capa mas na halto. Pesey e siman aki riba Dialuna, a bay habri e pida caminda di Fase 1 bek manera por mira riba e potret aki.

   Awor ta Fase 2: Pero awor ta start cu Fase 2, cu ta for di mitar di RIU Palace Hotel bay nort te mitar di Hilton Aruba Caribbean Resort.

   Manera ta conoci, henter e caminda aki lo wordo renoba, pero e ta bay segun Fase. Un peticion pa automobilistanan, principalmente Taxista- y chauffeurnan di Bus, pa corda cu e area di construccion ta solamente pa personanan di construccion, por fabor no hala e baricadanan y pasa.

   Ruta di desviacion ta via Nelson O Oduber y e duracion di Fase 2 tambe ta 7 siman.