Asina esnan di Club Kibrahacha a celebra Dia di Mama y Tata na Manchebo

ORANJESTAD (AAN): Manchebo Beach Resort & Spa recien tabata anfitrion di un fenomenal brunch pa Dia di Mama y Tata,

ofreci na e miembronan di Club Kibrahacha 60+ cu a ser teni na e bunita Pavilion di aire liber.  Como 175 miembro di comunidad di ciudadanonan di edad grandi, a reuni pa celebra e ocasion cu fabuloso cuminda, amistad balioso, y musica en vivo.

   Dirigi pa Jeffrey Matos di Club Kibrahacha 60+, y gerente general Edgar Roelofs di Manchebo, e grupo cu tabata presente a demostra e espirito di union y gratitud.  Nan a goza di un delicioso brunch prepara pa e team culinario di Manchebo.

   E almuerzo tradicional aki di Dia di Mama na Manchebo, ta un actividad cu ta andando pa 30 aña caba, cu a conoce su debut bao guia di e anterior doño y pionero di turismo, Ike Cohen, d.f.m.  Awendia bao maneho di famia Slominski, gerencia ta sigui cu e tradicion aki di duna bek na comunidad.

   “Nos tabata honra pa ta anfitrion di e evento special aki pa miembronan di Club Kibrahacha 60+ un biaha mas,” ta loke Edgar Roelofs kende ta gerente general a declara.  “E tabata un ocasion yena di harimento, amor, y recuerdonan cu ta keda bibo pa semper.  Nos ta orguyoso di sigui cu e legado evento comunitario aki, y ta spera di por sigui celebra esaki hopi aña mas cu nos tan stima personanan di edad.”