ORANJESTAD (AAN): E cantante-compositor naci na Hulanda pero cu ta biba na Aruba, Paul Sterkenburg,
mihor conoci como Arucamba, a bolbe haya reconocemento internacional. Su ultimo single ‘She’ a drenta e playlist internacional di Reggae-Vibes ‘Picks Of The Week #180’ na number 10 e siman aki.
Mas prome, su single socialmente critico ‘Not My System’ tambe a wordo selecta pa e mesun plataforma y a alcansa di 37 lugar. Esaki ta haci cu ‘SHE’ ta e di dos lansamento consecutivo di Arucamba cu ta bin na remarca internacionalmente pa Reggae-Vibes.
Reggae-Vibes ta un plataforma internacional sigui mundialmente pa entusiastanan di musica di reggae Y roots. E seleccion semanal di ‘Picks Of The Week’ ta trece lansamentonan nobo na atencion di un publico internacional y ta wordo considera den henter e comunidad di reggae como un gran reconocemento pa tanto artistanan emergente como esnan estableci.
Tur e musica di Arucamba ta skirbi, graba, y produci completamente independientemente den su propio Backyard Studio na Aruba. Den e ultimo lunanan, su musica tambe a haya airplay riba varios emisora internacional di reggae y radio, incluyendo na Jamaica y Aruba.
Paul Sterkenburg a expresa cu, “mi ta traha mi musica for di Aruba, cu hopi amor pa reggae y un mensahe cu ohala ta toca hende. E hecho cu mi canticanan tambe ta wordo recogi internacionalmente ta duna mi un motivacion enorme pa sigui bay.”
