Arubus tin mas debe cu loke tabata e caso di Serlimar

Minister Ursell Arends, titular di Transporte:

*Entrante Augustus ta bin cambionan den e compania 

ORANJESTAD (AAN) – Minister Ursell Arends, como titular di transporte, den entrevista cu DIARIO a señala cu e por comparti cu tin reclamo riba Arubus, ya cu tur hende sa e situacion di e compania estatal aki, locual gobierno a bin confronta cu ne.

            E dignatario a menciona cu Arubus ta un compania den debe, mas di locual Serlimar tabata aden, pero gobierno ta trahando pa drecha e situacion aki y ya caba a duna pasonan p’adilanti.

            “Dentro di poco lo mi presenta e maneho, pa loke ta trata transporte publico en general, y akinan lo bin varios cambio, specificamente pa Arubus. Lo bin un maneho tambe kico nos kier logra cu Arubus, y na e momentonan aki nos ta trahando pa dentro di poco, cuminza introduci e bushaltenan mirando cu esaki ta un di e kehonan primordial cu nos ta ricibi di usuarionan, no solamente studiantenan cu tin cu para den solo pero tambe publico cu tin cu yega nan trabao”, e mandatario a expresa.

            El a agrega cu ora tin yobida nan ta yega trabao tur muha, y studiantenan tambe ta yega scol tur muha.

            Minister Arends a anuncia cu nan ta bay cambia tambe e fleta di Arubus, y pa loke ta cambionan den Arubus mes, e ta premira cu pa 1 di Augustus venidero, lo lanza un aplicacion cu ta bay duna datonan ki ora e bus ta yega p’asina e usuarionan por mantene Arubus accountable tambe, mirando cu tanto e trahado como e studiantenan mester yega trabao y scol na ora.

            “Di e forma aki nos ta cuminza pone e responsabilidad di mantene Arubus tambe  accountable den man di ciudadanonan, p’asina nan por vigila con Arubus ta opera. Ta bay tin cambionan tambe pa loke ta trata e rutanan, y e operacion di e compania y tur esaki ta bay cuminza tuma lugar e aña aki”, e mandatario a duna di conoce.

            Arends a señala tambe cu e aña aki ta bay cuminza haci inversion den e bushalte na San Nicolas, cu lo bay bira un stacion moderno, y cu djeynan mas cos por tuma lugar den conectividad.

Dentro di poco e plan aki lo wordo anuncia oficialmente, y asina aki pueblo di Aruba lo tin un perspectiva kico ta e cambionan cu ta bay tuma lugar den Arubus. Asina Minister Ursell Arends a indica.