Arubus a uni su mes na e proyecto  “Experimento Social” unda clientenan di FAVI a biaha como pasahero

Sannin Daou a relata:

ORANJESTAD (AAN) -- Sannin Daou, Relacionista Publico di Arubus, a duna di conoce cu e compania a dicidi pa uni su mes na e proyecto di FAVI, “Experimento Social”, manera e fundacion ta yam'e.

Diabierna e clientenan di FAVI a subi Arubus, pa asina e compania mustra e personanan cu incapacidad visual, cu nan cu nan por uza transporte publico, manera tur otro persona. Na momento cu FAVI a acerca Arubus, nan a mira cu ta un bunita proyecto, y cu nan ta join esaki.

Arubus kier encurasha e personanan cu incapacidad visual pa uza bus y pa nan move tur caminda, normal. Pa Arubus, segun Daou esaki tabata un test, den nan mes seno, pa wak si tur cos cu nan ta haciendo ta bay bon, of si tin cosnan cu nan tin cu drecha.

Nan a haya cu ta un bon momento pa nan coopera cu FAVI, y Daou mes a core den bus hunto cu e clientenan di FAVI, y ora nan a yega San Nicolas, a papia cu nan pa haya feed back, con e experiencia tabata pa nan.

Tabata tin tres grupo. Un a subi na Santa Cruz, otro na e terminal di Arubus na Playa, y e bus aki a pasa banda di e hotel pariba di aeropuerto y a subi otro grupo, y a caba hunto na San Nicolas.

Nan a regala FAVI tres smart card di Arubus, cu nan por sigui uza den futuro pa nan por sigui siña nan clientenan cu ta facil pa tuma bus. Y a palabra cu nan cu cualkier cliente di FAVI cu lo kier un smart card, nan por yama Arubus, y nan mes lo bay FAVI haci full e registracion, tuma potret, traha nan carchi y entrega esaki na FAVI, pa hacie mas facil pa nan. Sannin Daou a expresa cu e ta spera cu e proyecto lo a resulta un exito pa FAVI y pa Arubus tambe. Daou a conclui bisando cu e unidadnan di Arubus ta completamente capacita pa tuma pasaheronan cu tin un limitacion, clientenan di FAVI no ta un excepcion.