Usuarionan hopi desapunta:
ORANJESTAD (AAN) – Tin un grupo di usuario di Arubus cu ta hopi desapunta cu e compania, pasobra nan a limita drasticamente, e servicio di transporte pa e areanan di Rooi Kochi, Mabon y becindario.
Arubus tabata core e rutanan aki cu e regularidad cu ta core otro rutanan pero diripiente a cuminza duna servicio biniendo Playa, pa 6.20’or di mainta (saliendo di San Nicolas pasa Rooi Kochi, Mabon, etc) y di Playa pa e rutanan aki te 6 or di atardi. Trahadornan cu tin cu yega trabao mainta y bin cas bek atardi, no tin ningun otro opcion. Pa remarca. den fin di siman no tin servicio di Arubus mes, pa e area aki.
Den e barionan menciona tin hopi ciudadano di edad grandi cu semper mester a uza Arubus pa bay ImSan, por ehemplo, of pa bin Playa den transcurso di dia, tin cu busca otro forma di transporte pa yega akinan, y no semper esaki ta posible.
Usuarionan ta urgi Arubus pa restablece e orarionan cu tabata tin, pasobra e manera aki di limita e pasaheronan cu ta biba den e barionan menciona, no ta na su lugar y ta discriminatorio!
