Arubiano na Hulanda a gana premio como ‘Mihor Sales Manager’ di aña 2023

Elogio sigur pa Elton Barbour

ORANJESTAD (AAN): Informacion ricibi di Hulanda, ta indica cu Elton Barbour a worde Premia na Hulanda como miho  Sales Manager di aña 2023.

   E proceso a worde haci pa compania International Workplace Group, conoci como IWG.

   Elton Barbour ta emplea na IWG como Area Sales Manager pa regio West, cu ta cubri Den Haag, Rotterdam, Zoetermeer, Delft, Rijswijk, Gouda, Leiden y Alphen a/d Rijn

   IWG ta un compania cu ta riba bolsa international y ta existi  for  di aña 1989 cual tabata bao nomber Regus. Desde aña 2011 a cambia nomber y bira IWG. E compania aki ta brinda Workspace flex rond mundo, y tin mas cu 10.000 personal den servicio  riba 120 pais rond mundo.

   Compania International di renombre manera Microsoft,  Disney, Samsung, Spotify, McAfee, BlackRock y mas ta  huur Workspace cerca IWG.

   Na aña 2021-2022 temporda di Covid hopi empleado tabata traha for di cas. Na 2023 compania nan Hulandes a cuminsa ofrece Workspace flex pa diferente compania. Door di Elton Barbour su experticio den benta el a sa di convence varios compania Hulandes pa huur Workspace cerca IWG.

   Di e forma aki Elton Barbour merecidamente a sobresali como e miho  Sales Manager di aña 2023, y la worde premia door IWG.

   DIARIO y demas amigonan kier felicita Elton Barbour como un Arubiano cu a destaca na Hulanda cu e logro special aki.