Aruba y Hulanda ta sigui uni forsa pa un futuro alinea den desaroyo sostenibel

Secretario di estado Van der Burg: ‘Aruba ta bon bezig’

ORANJESTAD (AAN): Recientemente Prome Minister Mike Eman a reuni cu Secretario di Estado Eric van der Burg, hunto cu Minister Gerlien Croes y Minister Geoffrey Wever, den Sala di Conseho di Ministro. Secretario di Estado Van der Burg a indica cu Aruba ainda no ta haciendo un escogencia final, pero si un escogencia inicial importante: mira padilanti y determina con Aruba, e tereno di refineria y San Nicolas por bira mas fuerte.

   Van der Burg a subraya cu e cuatro paisnan den Reino mester sigui traha hunto pa fortalece Reino y stimula crecimiento economico. El a elogia tambe maneho financiero di Aruba, señalando cu debe publico ta baha y cu presupuesto ta registra surplus anual.

   Aruba ta bon bezig: Durante bishita di Secretario di Estado pa Relacionnan den Reino, Eric van der Burg, na Conseho di Ministro di Aruba; Gobierno di Aruba y Gobierno Hulandes a reafirma nan compromiso pa traha hunto riba un futuro sostenibel pa e tereno di ex-refineria y pa San Nicolas. E momento a sosode ora cu Prome Minister Mike Eman a firma e Herinrichting Aruba Raffinaderij Terrein (HART)-project den presencia di e secretario di estado.

   E acuerdo aki ta haci posibel cu expertonan Arubiano y Hulandes hunto por yega na posiciona un plan pa duna e tereno di refineria un proposito nobo. Minister Presidente Mike Eman a califica e momento como historico pa Aruba. El a resalta cu refineria a desempeña un papel importante den desaroyo economico di Aruba y di Reino, y den pasado tambe den suministro di combustibel na e aliadonan durante Segundo Guera Mundial.

   Gobierno ta mantene tur opcion habri mientras cu expertonan ta investiga e diferente posibilidadnan pa futuro di e area. Un di e prioridadnan ta limpiesa di e partinan cu definitivamente mester wordo sanea y preparacion di e tereno pa desaroyo nobo. Na mes momento, Gobierno lo evalua si tin posibilidad pa algun forma nobo di actividad industrial relaciona cu refineria, teniendo cuenta cu e desaroyonan na Venezuela.

   Minister Presidente Eman a enfatisa cu cualkier desaroyo nobo mester ta sostenibel y mester contribui na diversificacion di economia Arubano. Aruba ta conta riba experiencia y conocemento di Hulanda den e proceso. Tambe lo investiga algun modalidad unda e partidonan interesa por carga parti di e gastonan di limpiesa.

   Como parti di su programa na Aruba, Secretario di Estado Van der Burg a reuni tambe cu Gobernador Alfonso Boekhoudt. Na Universidad di Aruba, el a ricibi un presentacion tocante Kingdom Start Up Program, unda studiantenan di Aruba, Corsou y Sint Maarten ta traha hunto pa desaroya nan habilidad empresarial.

   Su agenda a inclui tambe un bishita na Crisis Management Office (CMO) pa papia tocante e asistencia cu Aruba a coordina despues di e reciente temblornan na Venezuela. el a reuni ademas cu miembronan di e ekipo di CMO y Cruz Cora Aruba cu a bay Venezuela. Secretario di Estado a bishita Ecotech pa haya un mihor impresion di e problematica di desperdicio y reciclahe na Aruba. Den cuadro di desaroyo economico, el a bishita Vaper Trading, e prome compania na Aruba cu a haci uzo di e areglo BMKB ACS, cu ta facilita acceso na credito pa empresarionan na Aruba, Corsou y Sint Maarten.

   Cu e cooperacion aki, Gobierno di Aruba ta pone un paso importante pa saneamento di e area, atraccion di inversion y creaccion di oportunidadnan economico nobo pa San Nicolas y henter Aruba