ORANJESTAD (AAN) – Premier Wever-Croes, den conferencia di prensa di Dialuna, a duna un actualisacion tocante e desaroyonan cu Hulanda, Landspakket y COHO.
RIBA DOS TRAYECTO:
Minister Presidente a splica cu Aruba y Hulanda ta bezig riba dos trayecto. Uno ta e Landspaket y e Uitvoerings Agenda, pa e di tres cuartal, y e otro ta e leynan di COHO cu mester bay via e Rijkswet.
LANDSPAKKET:
“Si mi cuminza cu e prome, tur hende por a tuma nota dia cu Secretario di Estado Knops y ami a firma e Uitvoerings Agenda, di e di dos cuartal cu nos ta aworaki; esey tur cos a bay bon, y aworaki nos ta preparando pa e di tres cuartal. Basicamente e mesun tipo di accijns. Tin biaha tin hende ta bisa cu e cos a keda mescos, y ta berdad pasobra tur e palabracionnan ta pa termino largo, anto den e Uitvoerings Agenda nos ta parti'e pida pida den kico ta bay awo, kico ta bay despues”, Minister Presidente a splica.
E mandatario a señala cu aworaki nan ta bezig cu esaki, pasobra na Juni tin cu determina e Uitvoerings Agenda pa e di tres cuartal, pa asina Aruba bin na remarca pa e sosten di likidez cu mester tambe pa e aña aki.
“Segun nos calculonan nos ta mira cu nos ta recuperando economicamente. April tabata un hopi bon luna pa turismo y Mei tambe. Nos a mira cu te cu April nos institutonan ta indica cu nos ta recuperando cu 50% caba y esey ta hopi bon, pero e no ta 100% ainda. Esey kiermen, cu nos ta sigui depende di e sosten di likidez di Hulanda”, e dignatario a remarca.
El a agrega cu te ainda e no ta premira cu tin cosnan hopi dificil den e di tres cuartal, pero si tin, nan ta wordo delibera cu “doño di curpa” y gobierno ta cerca e stakeholders pa por yega na un consenso y na un palabracion den Juni, kico ta e Uitvoerings Agenda pa e di tres cuartal.
Minister Presidente a bisa cu tin hende ta bisa con e por hacie si e ta demisionario. “Landspakket ta un palabracion cu nos tin. E sosten di likidez ta necesario pa henter Aruba, bo ta demisionario of no. Y 1 di Juli bati, e sosten di likidez mester tey. Esey nos ta take care di esaki manera nos a palabra cu Hulanda!” Premier Wever-Croes a bisa.
COHO:
Pa loke ta trata e leynan di COHO y e dos Rijkswetnan, gobierno ta na mesa di negociacion cu Hulanda y esaki ta den bon direccion.
“E discusionnan ta riba e temanan, e conseho di Raad van Staten ta wordo hopi sigui, y mi ta hopi contento di mira esey. Nos no ta cla ainda, tin un trayectoria ainda nos dilanti cu ambos ley, pero nos hendenan ta trahando riba dje na mesa, pa asina nos por yega na algo”, Minister Presidente a señala.
