Aruba Tourism Authority y Qredits a firma acuerdo pa extende Aruba Signature Experience te 2017

ORANJESTAD (AAN): Aruba Tourism Authority (A.T.A.) y Qredits Aruba a firma un acuerdo nobo pa continuacion di e programa di Aruba Signature Experience pa e proximo tres añanan.

E colaboracion aki ta reafirma e compromiso di e dos organizacionan pa sigui duna sosten pa negoshinan nobo y empresarionan local, mientras cu ta sigui desaroya turismo niche.

   Aruba Signature Experience ta un programa cu a cuminsa na aña 2021, net despues di e pandemia, como un iniciativa conhunto di A.T.A. y Qredits Aruba pa yuda empresarionan local of negoshinan nobo y pa desaroya y promove experencianan unico y di balor halto pa e bishitantenan di nos isla. Durante e ultimo 3 añanan, e programa a yuda negoshinan chikito y nobo drenta den e industria turistico di Aruba exitosamente, door di duna nan e guia y sosten necesario, mientras cu e ta enrikece e experencia di e bishitantenan cu actividadnan of servicionan autentico.

   E 11 ganadornan di Aruba Signature Experience a logra introduci servicio y experencianan unico y imersivo cu ta pone enfasis riba nos patrimonio cultural, nos naturalesa, y tambe den e area di bienestar y romance.

E aña aki, e acuerdo ta inclui un ampliacion importante: e programa lo no ta habri solamente pa negoshinan cu ta ofrece experencianan of servicionan unico, sino tambe pa artesanonan local. E expansion aki ta alinea cu e vision di A.T.A. pa promove turismo cultural y duna sosten na nos artesanonan y empresarionan creativo.

  Tin dos manera cu empresarionan y artesanonan por bin na remarca pa e Aruba Signature Experience. Interesadonan por aplica pa participa na e Small Business Academy di Qredits Aruba caminda durante un periodo di 10 siman largo, participantenan lo ricibi guia structura y intensivo pa asisti nan den e proceso di lanta un negoshi. Esaki tin un costo di 350 Florin. Importante pa menciona ta cu negoshinan cu aplica pa financiamento directamente cu Qredits Aruba tambe por bin na remarca pa worde selecciona pa forma parti di e Aruba Signature Experience. Primordial ta cu e idea of negoshi mester ta enfoca riba eco-turismo, turismo cultural, romanticismo of bienestar personal.

   Na final di e programa, Aruba Signature Experience lo scoge un maximo di cinco ganador cu lo worde selecciona pa ricibi sosten completo di A.T.A. y Qredits Aruba cu ta inclui sosten financiero, asistencia cu marketing y branding, y coaching pa desaroyo strategico di e negoshi. Interesadonan por registra no mas tarda cu 1 di mei 2025 pa e Small Business Academy cu lo cuminsa dia 7 di mei venidero.

  E acuerdo nobo a worde firma pa Ronella Croes, CEO di A.T.A., y Nathaly Harms, Branch Representative di Qredits Aruba durante un rueda di prensa. E momento aki ta marca e continuidad di un colaboracion exitoso cu ta duna impulso na negoshian chikito na Aruba.

  “Nos ta emociona pa sigui e colaboracion aki ku Qredits Aruba, expandiendo e oportunidadnan pa nos artesanonan y empresarionan local y fortaleciendo Aruba su posicion como un destinacion conoci pa su experencianan unico,” segun Ronella Croes, CEO di A.T.A

  Nathaly Harms, Branch Representative di Qredits Aruba a agrega: “Na Qredits Aruba, nos ta dedica na duna sosten na negoshinan chikito, empresarionan nobo y start-ups. Nos ta percura pa duna nan e hermentanan necesario pa logra exito. E partnership aki cu A.T.A. ta asina importante pa nos, pasobra e lo duna mas empresario y artesano e oportunidad pa transforma nan vision den realidad, beneficiando tanto e economia local como tambe turismo di Aruba.