Aruba Tourism Authority ta parti di evento culinario cu Chef François Geurds y Aruba Marriott Resort

ORANJESTAD (AAN): Aruba Tourism Authority ta contento di por aporta di varios forma na Aruba su desaroyo culinario,

y ta gradici Aruba Marriott Resort pa acerca nos pa un evento unico manera cu ta bay tuma lugar e weekend aki, unda cu François Geurds, un chef cu su “roots” nan na Aruba, residencia na Hulanda, y renombra cu dos strea Michelin, lo ta cushinando cu nos talentonan local durante dos anochi espectacular.

   Na banda di aporta na e evento, A.T.A. tambe ta percura pa combina e evento cu un cobertura internacional pa periodista Bastian van Tel di Quote Magazine pa asina sigui introduci nos talentonan local den e area di gastronomia. Quote Magazine ta un revista renombra di Hulanda cu lo bay cubri e experiencia culinario na Aruba.

   Turismo culinario ta un area di enfoke pa A.T.A mirando cu e bishitante ta keda busca e experiencia nobo di variedad y calidad culinario. Algo cu Aruba tin den su disposicion pa ofrece. Ora ta papia tambe di incrementa e patronchi di gasto di e bishitante, e area culinario ta brinda e oportunidad pa haci esaki. E ta ya caba parti di e top gasto di un bishitante y ta mira oportunidad pa sigui subi esaki. Abase di estudio haci, por menciona cu na 2022 e bishitante a gasta 130 miyon di Dollars na restaurant. Esaki ta basa ariba uzo di tarheta di Visa,unda cu un total di 434.262 carchi a worde usa. Esaki cu un gasto di $300 pa cada carchi.

   A.T.A. tin atencion special ariba e aspecto culinario den promocion di Aruba internacionalmente y ta pone atencion riba e sector aki tambe den esfuerso local. Pa medio di entre otro e estudio di “Niche” cu a caba di completa y delinea kico A.T.A. lo sigui haci pa yuda desaroya e industria aki. Por bisa cu den pasado tambe A.T.A. a duna su aporte na e sector culinario di E.P.I. Esaki ta un stakeholder importante cu lo desea di sigui wak con por yuda pa asina sigui eleva nos posición culinario.

   Ta gradici Aruba Marriott Resort y Francois Geurds y su team pa e oportunidad unico akinan pa Aruba, y sigur na nos chefnan local pa semper ta entusiasma pa idea nan creativo. Nan ta spera un weekend exitoso.