Aruba Tourism Authority ta dedicando y promoviendo Artweek grandemente

Nan ta mira e balor di esaki

ORANJESTAD (AAN): Tur spotlight lo ta dirigi atrobe riba San Nicolas entrante Dialuna 4 di September 2023 ora cu Artweek Aruba 2024 lo cuminsa atrobe, y lo inclui Diaranson 6 di September e ArtFashion, y e weekend di 8 cu 9 y 10 di September cu ArtFair mes.

   Esey ta loke Tito Bolivar di Artisa a divulga Diaranson atardi durante un conferencia di prensa convoca na Courtyard by Marriott.  A anuncia cu pa e aña aki, envez di ArtFair a dicidi na adopta e nomber nobo, “Artweek”.

   Na e ocasion aki tabata presente Tita Iglesias di Aruba Tourism Authority, y el a haya chens di splica cu Artweek ta un actividad hopi importante den calender di ATA pa Aruba.  Tin hopi motibo pa esey, pero e principal ta e longetividad cu e evento aki ta crea pa Aruba como destinacion turistico.

   E hecho cu ATA ta patrocina mas tanto e parti di muralnan, ta trece cune cu ora bishitantenan bin Aruba, nan ta tuma espacio pa bay bishita San Nicolas pa saca potret na e muralnan aki, y ora di pone nan riba social media, esaki ta crea henter un forma diferente pa internacionalmente Aruba wordo reconoci.  Asina a yega awor cu San Nicolas a wordo reconoci como Streetart Capital of the Caribbean.

   “Esey ta un nomber cu no ta asina facil bo ta gana, anto e ta un nomber cu nos debe basta di dje na Tito Bolivar y e evento aki,” Iglesias a indica.  Pa seis aña caba, ATA a contribui y coopera cu ArtisA, cu ArtFair, y Tito Bolivar pa cu e evento aki, y enberdad e ta un evento cu a cuminza chikito, pero cu ATA tabatin e vision cu e tin un potencial increible ora cu bo cuminza realiza piezanan di arte cu ta bay contribui na sigui promove e destinacion internacionalmente.

   Iglesias a mustra di ta contento cu a logra haci e actividad aki bira asina grandi, y awor el a bira un ‘Artweek’ unda tin cantidad di expresion di arte ta bin hunto, pa asina intercambia cultural- y artisticamente cu talentonan internacional, y e talentonan local ta haya un showcase pa expone nan obra y trabao.  E ta un oportunidad unico pa Aruba, pa localnan disfruta di un evento unico, gusta hopi internacionalmente y cu ta wordo promovi masha hopi na nivel mundial, y cu a haya un bida di su mes henter aña.

   “Laga nos tur apoya e evento aki, y Aruba henter ta bon bini pa bay disfruta no djis di e cuminda y bebida local, no djis di musica, pero e arte den tur clase di forma,” Tita Iglesia di ATA a indica.

    “E ta un manera di reconoce loke nos tin na Aruba, pues duna importancia y balor na loke nos tin riba e isla,” el a finaliza bisando.  Riba e website di artweekaruba.com por haya detaye di prijs di tickets y con pa cumpra online.

   Artweek Aruba lo cuminza Dialuna 4 di September, y culmina cu ArtFair riba weekend di 8, 9, y 10 di September na San Nicolas.