Bunita comentario di un ciudadano residente: -ORANJESTAD (AAN) – Relaciona cu e hecho cu Dialuna cu a pasa a worde celebra e Dia Internacional di e Poblacionnan Indigena na Mundo,
un cabayero cu a identifica su mes como “Saul”, a tuma contacto cu Mesa di Redaccion di DIARIO, pa gradici e articulo publica den nos edicion riba e fecha concerni pero tambe pa haci un observacion.
Cu e pregunta “boso conoce e potencial di arte indigena cu tin na Aruba? Saul a comenta cu bal la pena pa averigua mas tocante e tema aki, pasobra parti di e imigrantenan cu Aruba tin ta indigena di Peru, Ecuador, Venezuela y un ke otro di Colombia.
Desde cu e pandemia a cuminza no ta mira nan mucho riba caminda, sigur no manera antes cu por a distingui nan pa e tipo di pañanan cu nan ta bisti. Por ehemplo esnan Peruano y Ecuatoriano, bal la pena pa djis laga nan contempla e arte cu ta cubri nan curpa, “Saul” a expresa. El a referi na e arte di cose y borda, hopi fini y delicado. Mescos e sandalianan cu nan mes ta traha cu ta un beyeza. E trahenan tipico cu un grupo Peruano ta bista ora tin un evento y nan ta haci presentacion di baile, of cualkier otro expresion di cultura, ta impresionante. Pero no ta solamente arte den bisti, sino tambe den obra di man y joyeria traha cu palo, piedra, semia di coffie, y mas. Y no lubida esnan cu ta pinta cuadro precioso, nan gastronomia, y tampoco e aspecto poetico pasobra den e rama aki tambe tin hopi talento meymey di e indigenan imigrante aki. Esaki, “Saul” a trece dilanti pa lanta e curiosidad den e pueblo di Aruba tocante e rikeza cultural cu, banda di esun di Aruba mes cu tambe tin su pasado indigena y su legado, e razanan aki a trece cu nan y cu kizas no ta expone nan arte ni ta busca un mercado pe, pasobra lanta un negoshi pa nan lo por ta casi imposible, financieramente.
Pa ultimo, e no kier a laga afo e indigenanan Wayuu di Venezuela cu tambe tin na Aruba, y cu ta sumamente creativo. Den pasado, nan tabata expone den actividadnan cultural di “Dia de la Raza” (Hispanidad) riba Plaza Betico.
Cu esaki e kier a recalca un rato riba e maraviyoso mundo riba su mes cu yama Aruba, cu su diversidad di “color, sabor, cultura y arte” cu tin den nos comunidad, incluyendo e pueblonan indigena cu a scoge e Isla stima aki, pa bin biba.
