Eduard Pieters di PPA:
ORANJESTAD (AAN): Eduard Pieters, miembro activo di partido PPA, ta sigui di cerca e desaroyonan politico rond e tema critico di adulto mayor na Aruba. “Nos no por sigui trata e temanan cu palabra of bon deseo,” segun Eduard. “E cifranan no ta laga espacio pa duda: nos ta papia di un grupo creciente, vulnerabel y ta haci un yamada urgente riba nos sistema di cuido.”
Un deficit grandi
E cifranan ta alarmante: Aruba tin 20 mil adulto mayor (65+), aproximadamente 19% di e populacion. Pa atende cu nos grandinan na un forma digno, nos mester rond di 100 miyon florin. E actual presupuesto ta indica cu nos falta structuralmente y anualmente mas o menos 80 miyon mas pa yega dicho suma. Sinembargo mas preocupante ta, cu segun proyeccion di 10 pa 15 aña, e gasto aki lo subi pa mas di 300 miyon. "Nos no por sigui laga esaki crece na un crisis social y humano y warda te ultimo momento pa tuma accion necesario. Awor mester cuminsa traha riba un plan serio, digno y integral" Eduard ta agrega.
Cuido digno ta un derecho
Eduard Pieters a enfatisa cu e problematica ta amplio y p’esey mes PPA a pone den su campaña na 2024 den su plan di gobernacion “Plan Nos Aruba 2050”, unda ta atende e preocupacionnan aki, manera; pensioen cu no yega na bestaansminimum, insuficiente centro di cuido y profesionalnan adecua y un sistema cu falta maneho integral. Un di e solucionnan clave cu PPA a identifica ta, pa activa articulo 17 di e ley di AZV, cu ta un clausula cu por habri e posibilidad pa AZV subsidia cuido pa adulto mayor. “Si nos no pone e articulo 17 aki di Ordenansa Nacional AZV den movecion, nos ta faya pa cumpli cu e derecho di nos graninan pa un bida digno,” ta su mensahe.
Inversion den nos hobennan
Otro punto crucial ta e falta di e profesionalnan den instancianan manera; WGK y SABA. Partido PPA ta insisti riba un plan nacional pa stimula hoben pa studia y traha den e sector di geriatria (enfermedad di embehecimento) y cuido prolonga. “E bienestar di adulto mayor no mester depende di suerte of consider’e un luho, sino e mester ta planifica den un maneho serio y integral di gobierno,” segun Eduard.
Como un miembro di PPA cu ta sigui e realidad di Aruba paso pa paso, Eduard Pieters ta pidi pa gobierno y henter Parlamento para keto riba e tema aki. “E tema di adulto mayor no por warda mas. Un plan integral no ta un luho, sino un obligacion moral pa un pais cu ta cuida di esunnan cu a traha duro den nan tempo y merece un bida di calidad como adulto mayor,” el a termina bisando.
