Aruba ta mirando un crecemento economico positivo

ORANJESTAD (AAN): Prome Minister Evelyn Wever-Croes a indica cu pais Aruba ta den pleno desaroyo.

E estadisticanan pa loke ta trata turismo, ta mustra cu ya desde comienso di aña, a sobrepasa e nivelnan di prome cu pandemia, y cu den e ultimo lunanan, Aruba ta hayando mas tursita compara cu prome cu pandemia. Informacionnan positivo di ultimo dianan ta indica cu ya 3 linea crucero a compromete pa aumenta nan cantidad di ‘calls’ pa Aruba den 2024!

   Lo mas principal ta, cu e turistanan cu ta bishitando ta gasta mas, lagando asina mas placa den e economia di pais Aruba. Esaki ta resultando den mas negoshi habriendo, creando mas cupo di trabao pa e tata y mamanan di famia, cu lo ricibi un salario digno pa asina por cubri nan gastonan y mantene nan famia. Prome Minister a splica cu e desaroyo positivo aki, ta hopi bon pa pais Aruba y di gran beneficio pa e mercado laboral.

   Tambe desaroyo pa loke ta trata tarifa di importacion, manera ya Departamento di Impuesto y Minister di Finansa a indica, hunto cu e cobransa di BBO na frontera tin un simplificacion y cambio den tarifa di impuesto riba importacion (invoerrechten) di varios producto desde1 di augustus. Ta trata aki di mas di 660 post cu ta conoce un cambio entre otro, cuminda y bebida, apartatonan cu ta genera energia berde, vehiculo y auto electrico, instrumento musical, buki, y material di construccion.

   Un otro indicacion di desaroyo positivo na Aruba nos por mira den e rapport di IMF na unda cu nan a indica cu e crecemento economico di Aruba ta impresionante danki na e bon maneho di Gabinete Wever-Croes durante e pandemia. Mientras cu Banco Central a indica cu e crecemento economico ta mas di loke a premira. “Esaki ta yena nos cu orguyo pa e forma responsabel y determina cu Gobierno a maneha nos pais den tempo di crisis y awo den recuperacion”, Prome Minister a expresa.

   Premier Wever-Croes tambe a expresa di ta sumamente satisfecho cu e resultado positivo di graduacion pa cu e ultimo aña escolar. E porcentahe di graduadonan pa e aña escolar 2022 -2023, ta mas halto cu prome cu pandemia. Esaki kiermeen cu e hobennan cu mester a lucha cu nan estudio durante pandemia, a haci tur nan esfuerso pa awe nan por a obtene nan diploma. E resultado aki sigur ta motibo pa ta hopi orguyoso di nos studiantenan, cu awor ta prepara pa sigui nan estudio den otro pais, of aki na Aruba mes.

   "Aruba ta den pleno desaroyo, y ta importante pa sigui cu e desaroyo aki. Nos isla ta bendiciona, y ta conta cu un comunidad cu semper ta sostene y ta lucha hunto pa hiba e baranca aki dilanti. Nada ta pasa di su mes, e ta tuma esfuerso y dedicacion pa yega na e metanan cu nos kier yega. Te ainda, nos no a yega na unda nos kier, pero hunto, cu fe den Dios, cu trabao duro y un actitud positivo, indudablmente nos lo logra", Prome Minister a expresa.