ORANJESTAD (AAN) – Actualmente, Aruba ta conta cu un ciruhano so, pa atende cu operacionnan di cancer na pecho, tripa y klier. Kiermen, un docter specialista den e ramo aki so tin pa cubri e necesidadnan di henter nos pueblo.
E ciruhano oncologo cu ta na encargo di practicamente tur pashent local, cu ta sufri di e tiponan di cancer menciona, ta man completamente yen y poco espacio pa atende cu tur e pashentnan aki, cu pa su consulta ta demasiado. Esaki for di dia cu e otro ciruhano oncologo a bay biba y sirbi na otro isla, y e demanda pa un solo ciruhano a mas cu duplica.
Danki Dios e ciruhano oncologo cu ta sigui traha pa su pueblo ta hopi dedica y tremendo profesional, pero e expectativanan cu e docternan cu ta manda mas pashent cerca dje, y e pashentnan mes tin ta bay mas aya di e capacidadnan di tempo y espacio cu e docter tin, y e ta un profesionan cu semper a, y ta sigui, traha incansablemente.
Pero asina mes tin momentonan cu e mester hala fecha di operacion pa un pashent cu no ta den estado di gravedad, pa duna prioridad na esnan cu ta hopi urgente. Tambe e fechanan di control pa pashentnan cu a opera caba ta cambia, specialmente si nan test, manera mammogram, ta sali bon.
Mester pensa si, cu e docter tambe ta un ser humano cu tambe ta sinti cansa tin ora, cu tin un famia cu tampoco e por laga un banda cada bez, cu por bira malo (Dios spaar e), cu mester di espacio pa relax, etc.
Esaki ta nifica cu gobierno (AZV) mester haci su esfuerzo pa busca un reemplazante pa e ciruhano oncologo cu a dicidi, cu tur su derecho, di bay busca su suerte den otro lugar pafo di Aruba. No ta husto cu e peso y consecuencia di esaki mester wordo carga pa e par di man di un profesional so.
Tin hende cu ta pendiente di un operacion of un cita, cu ta puntra nan mes si ta na Aruba so e tipo di situacionnan aki ta existi, den e mundo medico! (Datonan compila door di version di pashentnan mes).
