Aruba ta conoce su prome studiante piloto local cu ta haci su 'solo flight'

Despues di hopi aña,

ORANJESTAD (AAN):  Dia 9 di Juni ta un dia hopi importante pa e mundo di aviacion na Aruba, despues di hopi aña, Aruba ta conoce su prome studiante piloto local cu ta hasi su solo flight hunto cu HiDreams Aviation Academy.

            Mr. Gabriel Gomes a cuminsa su trayectoria pa bira un piloto priva na September 2021. E trayectoria aki ta cuminsa cu 6 siman di les di teoria cu Mr. Rennel Tromp.

             Despues di e 6 siman di les, Mr. Gomes a bay Florida, USA y a pasa su examen di teoria cu 92%. Cu un examen exitoso e la bolbe Aruba, pa sigui su trayectoria pa asina cuminsa fase 2 di su training, cual cu ta e parti practico.

            E la cuminsa bula avion conhuntamente cu HiDreams su Certified Flight Instructor (CFI), Mr Ashley Croes. E mester a bula 30 ora pa por a haci su solo flight. Esaki tabata exitoso y asina e por sigui pa su ultimo fase, cual cu ta bay Florida pa ricibi su licencia di piloto.

            HiDreams Aviation actualmente ta trahando cu Pilot Training Center na Miami, un scol cu ta produci mas cu 1000 piloto pa aña. E ta haci e proceso pa bira piloto na Aruba un poco mas facil. Desde cu HiDreams a cuminsa, a logra educa 22 studiante local y brindando e oportunidad pa bira piloto na nan mes un cas.