Segun Parlamentario Gino Goeloe:
*Tin cu tuma medidanan awe!
ORANJESTAD (AAN) – Parlamentario Gino Goeloe, fraccion di FUTURO, den su entrevista cu DIARIO a declara cu Aruba ta confrontando un embehecemento acelera di nos poblacion di adulto mayor (nos grandinan).
Goeloe a señala cu 26% di nos poblacion, cu ta 28 mil persona ta riba 60 aña, y di e cantidad aki 20 mil ta cay den 60 plus, pues un grupo masha grandi mes. Y den e pronostico 2030 e ta bira 28%, y esey kiermen cu 30 mil persona lo ta riba 60 aña, of mas. “E problema aki no ta na Aruba so, e ta regional, na mundo, e ta na Curacao, na Bonaire, na Sint Maarten, na tur e islanan Caribense, Jamaica, Trinidad & Tobago, etc., pues tur e Islanan cu mi tin contacto cu nan, y nan tin mesun problema cu nos tin na Aruba. Pero nos na Aruba tin’e mas grandi cu nan pasobra nos cifranan ta mas halto cu di nan, y nos tin cu tuma medidanan awe”, Parlamentario Goeloe a señala.
El a subraya cu e mes cu a fungi 23 aña como director di Wit Gele Kruis a wak e problema aki for di añanan prome, y el a skirbi un rapport y un presupuesto.
“Mi a toca tur porta di tur minister e tempo ey, pero ningun hende a duna hende extra na Wit Gele Kruis ni na Fundacion SABA. Y mi ta kere cu awo si a yega tempo pa duna e fundacionnan, Wit Gele Kruis, mas oido y mas placa, den e caso aki pa aumenta e cuido na cas. Saba tambe mester haya mas placa pa camanan cu tin bashi. Bo tin camanan bashi na Aruba, pero e director cu e no tin e placa pa habri e camanan. E tin personal, no tur pero pa pone nan gradualmente habri e camanan aki; y SABA tin un lista di spera di riba mas di cien persona ta warda drenta eyden. E casnan di cuido priva nos tin cu reforza nan; kiermen, controla nan regularmente, y wak cu nos por yuda e personal cu ta trahando eynan, dunando nan e opleiding cu merece”, Parlamentario Gino Goeloe a señala.
