Aruba ta compromete pa yega cero emision di carbon pa 2050

Ministro Ursell Arends:

• Hunto cu Iniciativanan Sostenibel pa Turismo y Aviacion 

ORANJESTAD (AAN): Manera DIARIO a trece dilanti recien, Ministro Ursell Arends tabata na Republica Dominicana pa un simposio importante di ICAO pa cu aviacion.

   Durante e "ICAO Global Implementation Support Symposium 2024" na Santo Domingo, Minister Arends a dirigi palabra na lidernan mundial y a delinea e compromiso di Aruba pa alcansa e obhetivo global di cero emision di carbon pa 2050.

   Enfatisando su rol como Minister di  tanto e sector di transporte como proteccion di naturalesa, Minister Arends a asegura e compromiso firme di Aruba na e meta aspiracional a largo plaso pa integra practicanan sostenibel y trece balanse entre e sector di turismo y e preservacion di naturalesa.

   "Nos ta enfrenta desafionan unico como un isla chikito cu ta depende ariba conectividad aereo. E dependencia aki riba turismo—cual mayoria ta turismo aereo—ta rekeri nos pa reevalua e impacto di e crecemento di e sector aki," e Minister a menciona. "E capacidad di carga di Aruba pronto ta un tema relevante cu bibando den nos comunidad, cu lo rekeri un ahustacion na e desaroyo di e sector di turismo, alavez un efecto siguiente lo ta riba emisionnan di carbon. E balans entre transporte aereo y conservacion di naturalesa ta bira esencial pa Aruba su futuro."

   Puntonan principal cu a worde menciona ta:

(*) Conseho Nacional di Resilencia Climatico (NCRC): Aruba a establece un conseho dedica pa mehora e resilencia climatico di nos isla, poniendo como punto di salida e bienestar di tanto sociedad como naturalesa pa futuro generacionnan.

(*) Plan di Accion Estatal pa Aviacion: Siguiendo e guianan di ICAO, Aruba ta desaroyando un plan comprensivo pa reduci emisionnan di aviacion mediante combustibelnan sostenibel, tecnologia nobo, mehoracion operacional, y compensacion di carbon.

(*) Colaboracion Regional y Internacional: Aruba ta sigui participa activamente den e Comision de Aviacion Civil di Latino America (LACAC) y ta uzando su relacion como parti di Reino Hulandes pa comparti conocemento y fortalece esfuersonan colaborativo contra desafionan climatico.

   Minister Arends a resalta e necesidad pa strategianan di adaptacion. Por ehempel e posibel impacto di subida di nivel di lama, riba infrastructura di Aruba su aeropuerto. Subrayando e urgencia di planificacion pa e sostenibilidad a largo plaso di e conectividad di e isla.

  "Enfrentando e realidad di cambio climatico, strategianan no solamente mester enfoca riba mitigacion pero tambe adaptacion," e Ministro a conclui.