Segun Luenne Gomez-Pieters, directora di DIMP:
ORANJESTAD (AAN): Pais Aruba aworaki ta den un situacion mas stabil compara cu loke tabatin. Prome cu Covid, e trabaonan cu a sosode riba tereno di e reformanan fiscal ta keda refleha den presupuesto. Desde 2023 tin presupuestonan cu ta carga un surplus y ta studia e efecto di e reformanan aki riba economia, asina Directora di Departamento di Impuesto, Luenne Gomez-Pieters a duna di conoce den entrevista cu DIARIO.
El a sigui bisa cu DIMP ta den combersacion estrecho cu Minister di Finansas, Geoffrey Wever caminda cu el a vocifera cu e programa di gobernacion ta e guia pa e cuater añanan cu ta bin. Den e programa aki, maneho di finansas publico ta un topico hopi importante.
Segun Gomez-Pieters, a pone den e programa di gobernacion algun punto di atencion y ta e dependencia di solamente un pilar economico cu ta turismo.
Durante hopi aña a papia riba diversifica e economia di Aruba locual no ta algo facil, pero ta bay cuminsa paso pa paso pa e maneho financiero ta enfoca riba mantene e industria turistico y tambe acelera e desaroyo den sectornan economico nobo manera agricultura comercial, economia blauw, maneho di pesca sostenibel, proteccion di e coralnan, energia renobabel, industria creativo, pa tin un balansa entre economia y proteccion di e sistema ecologico, el a indica.
El a sigui bisa cu e presupuesto lo bay wordo uza pa mehora poder di compra, pero tambe pa stimula comercio cu incentivonan fiscal of otro tipo di incentivonan.
Tin un documento cu a wordo traha na 2021 pa un grupo di experto y aworaki ta wordo revisa caminda cu por bin un propuesta concreto pa Minister di Finansas pa wak kico si ta factibel ariba tereno fiscal y economico, e directora di DIMP a declara.
Den e simannan cu ta bin DIMP lo duna su conseho pa asina esaki por bira un documento cu lo por bay discuti cu e sectornan concerni pa wak con por yega na pasonan concreto manera si mester cambia e ley, cambia e maneho of e tipo di burocracia cu tin y trece eficiencia den e trayectonan, Gomez-Pieters a expresa.
Minister Wever a duna di conoce tambe cu na 2026 e kier cuminsa cu algun incentivo si esaki ta na beneficio di e contribuyente of comercio, el a agrega.
