Aruba ta bay bon representa na un certamen na Republica Dominicana  

ORANJESTAD (AAN): Tabata Diasabra anochi trempan na Mi Dushi Casibari, e organizacion di Chaz Models

a organiza un evento pa asina corona 4 candidata kendenan e siman aki lo ta saliendo rumbo pa Republica Dominicana, pa representa Aruba den certamen di Festival del Talento & La Belleza Internacional 2022.

   E directora Chastity Kock tabata contento cu presencia di asina hopi persona na e ocasion special aki di 4 candidata cu ta bay haci nan best pa tene e nomber di Aruba na halto.

   E anochi aki a laga cada candidata presenta den nan trahe di baño, trahe di gala, y tambe trahe di coctail cu nan lo luci cune durante e eventonan na Republica Dominicana.

   Coronacion: Finalmente e candidata Thaheely Geerman di 8 aña a wordo instala como Mini Modelo Aruba 2022.  El a wordo corona door di Willy Aristizabal di Mi Dushi Casibari.

   E candidata Maya Gordon di 12 aña a wordo instala como Pre-Teen Model Aruba 2022.  El a wordo corona door di e diseñador Carlos Tromp.

   E candidata Anabell Bislip di 14 aña a wordo instala como ‘Beautiful Aruba 2022’.  El a wordo corona pa e simpatica Stacey van Gaalen kende ta Miss Youth Aruba 2021 y ta ex-Pre-Teen Model International 2016.

   E candidata Tanique Chan di 18 aña a wordo instala como ‘Teen Model Aruba 2022”, y a wordo instala pa Maryonne Fernandes Pedra kende ta docente di Paso pa Futuro, y a wordo corona pa Marielena Tromp kende ta un bon amistad di famia.

   Chaz Models ta contento cu e biaha aki nan ta bay cu un candidata special, pa asina demostra cu den e epoca moderno aki, e palabra inclusion ta haya un aspecto importante aki.

   DIARIO a nota cu cada candidata a demostra habilidad fenomenal riba escenario, pues nan tin tur e esencia di cana, pose, y sonrisa bon domina.