ORANJESTAD (AAN): Aruba ta sede di e Integrity Summit Dutch Caribbean 2025, un evento regional importante dedica na fortalece integridad y bon gobernacion den Reino Hulandes.
E seminario a inicia dialuna 3 di november 2025 na e ballroom di Hilton Aruba Caribbean Resort. E Integrity Summit, cu ta yega su di tres edicion, ta reuni e profesionalnan di integridad di tur parti di e region Caribe Hulandes pa comparti conocemento y traha hunto riba transparencia, responsabilidad y liderazgo etico.
E comite organisado, Bureau Integridad Aruba (BIA) a invita cu honor Minister-President di Aruba, Mike Eman y Minister di Husticia, Integracion, Transporte Publico y Energia, mr. drs. Arthur Dowers pa haci e apertura oficial di e siman. E participacion di Gabinete AVP-Futuro ta refleha e compromiso continuo di Aruba pa sigui promove gobernacion basa riba integridad y confianza publico.
E Integrity Summit ta un plataforma importante pa uni nos esfuerso pa fortalece integridad y bon gobernacion den tur parti di e Reino Hulandes. Integridad ta un base esencial pa un desaroyo sostenibel y un futuro mas fuerte pa nos comunidad y nos region.
Durante e siman lo tin varios presentacion, panel y discusion tocante desafio di gobernacion moderno, cooperacion entre e islanan y e sistema pa fortalece confianza den e institucionnan publico. E Integrity Summit Dutch Caribbean 2025 ta representa un paso importante pa promove un cultura di transparencia y responsabilidad, reforsando laso di cooperacion y confianza entre e paisnan y teritorio di e Reino di Hulandes.
