Aruba ta #1 den clima di inversion den region di Caribe

Ministro Geoffrey Wever:

ORANJESTAD (AAN): Desde 2021 Economisch Bureau Amsterdam a bin ta publica e datos nan riba clima di inversion (“investment climate”) den Caribe, pa medio di di e Caribbean Investment Climate Index (“CICI”). Pa di tres aña conscutivo, Aruba ta lidera e lista di Caribe cu e clima di inversion mas atractivo. Di tur pais riba e lista, Aruba a recupera mas fuerte for di e crisis di corona.

   Aunke Aruba ta number 1 riba e lista aki 3 aña consecutivo, ta notabel pa mira un mehoramento den e cifra di CICI.
  Minister Geoffrey Wever ta interpreta e noticia como un logro sumamente positivo, y ta un reconocemento cu Aruba ta riba e bon direccion ora ta trata haci negoshi y inversion. E index di CICI, ta cuadra tambe cu un publicacion recientemente di IMF, indicando movecion positivo den Aruba su economia, y en particular den e facilidad di haci negoshi (“ease of doing business”) cual ta conociendo mehoracion.

   St. Maarten a logra calcula su cifranan pa di prome biaha y a sali e di dos “investment destination” mas atractivo den Caribe. Esaki tabata posibel danki na mehoracion den disponibilidad di datonan di Sint Maarten. Contrario na Aruba y St. Maarten Curaçao ta baha for di 4 pa e di 7 luga riba e lista debi na e crecemento economico abou y e nivel abou di participacion cu a debilita e posicion di Curaçao.

  “Mirando atras na diferente proyecto cu ya caba ta den ehecucion, unda e enfoke ta netamente riba e topico di facilidad di negoshi”, Minister Wever ta comenta. Entre otro a introduci un maneho pa establecimento di negoshi nobo conoci como “Vestigingsbeleid”, cual a reduci rekesitonan ‘red-tape’ y e tempo necesario pa establece un negoshi. Digitalisacion tabata y lo continua di ta un factor importante pa sigui mehora e procesonan. E lo reduci gasto y tambe tempo entre aplicacion y entrega di permiso.

  Tambe tin promocionnan activo den exterior a traves di Invest in Aruba, cu ta promove Aruba como un ‘investment destination’, y e noticia di CICI sigur ta un confirmacion pa empresanan internacional cu Aruba ta un destinacion pa su inversion atractivo . Un trade mission recien pa Colombia tambe a enfoca riba e mesun tema.

   Minister Wever ta satisfecho cu continuamente ta logrando progreso den mehora procesonan pa lanta y haci negoshi, reduci bareranan, promove negoshi entre Aruba y paisnan cercano, crea oportunidadnan nobo pa diversificacion y facilita e transicion di nos economia pa uno mas sostenibel. “Noticia manera esun aki di CICI 2023 ta altamente aprecia”, segun minister Geoffrey Wever.