Drs. Martijn Balkestein, director ehecutivo KvK:
ORANJESTAD (AAN) – Director Ehecutivo di Camara di Comercio y Industria, Drs. Martijn Balkestein, den su entrevista cu Matutino DIARIO, a sigui bisa cu e prijsnan di mercado pa aña 2000, a crece cu 3 billion florin y aworaki na 2026, ta 7.3 billion. Esey kiermen cu tin crecemento di 120% y esey ta un logro fabuloso.
“Pero si nos mester wak e real GDP y mester wordo coregi pa inflacion, el a subi solamente cu 29% entre 2001 y 2023. Si nos ta wak e real GDP per capita, esey kiermen kico e ta realmente coregi pa inflacion pa persona biba na Aruba, el a subi cu 5.6% so. Basicamente, esey kiermen cu nos GDP ta bayendo bon pero nos mes no ta disfruta di e situacion ey”, Balkestein a señala.
El a pone esaki cu otro datonan, por ehemplo el a pidi datonan di SVb cu ta indica cu e entrada personal mediano, pa diferente sector, ta e balor cu 50% di e poblacion ta bao di dje y 50% ta riba dje; e ta parti net den dos seccion.
“Na 2015, e salario mediano promedio tabata 2473,=so. Cinco aña despues el a subi te cu 2.577,=. Kiermen, el a subi cu 4.2%. Awo el a subi cu 2.727,=. Esey kiermen, cu den diez aña el a subi cu solamente 10.3%, pero si bo ta wak inflacion den e mesun periodo ey, tabata 16%. Esaki kiermen cu, basicamente, nos no ta disfruta di e placa cu ta drenta. Den todo caso, e porcentahe di e poder di compra no a subi pero lo baha”, drs. Balkenstein a comenta.
Señor Balkestein a agrega cu por mira esaki den hopi dato cu el a pidi di CBS. CBS a mustra un tabel di entrada familiar, pa un hogar, unda por wak cu e entrada ey tabata, na 2023, na 4.100 florin. “Basicamente, bo ta puntra bo mes si 4.100 florin ta suficiente pa haci bo compras awo. Di mes, semper nan ta puntra si e bestand minimum su nivel ta mas halto, pero esaki ta pa cuater persona: dos adulto y dos mucha”, el a señala.
