Aruba reuni cu Secretario di Estado encuanto forma pa stop e recorte gradualmente di salario

Otro luna tur ambtenaar lo haya salario full bek

ORANJESTAD (AAN): E tabata un reunion virtual cu Secretario di Estado, Alexandra Van Huffelen.  Den esaki Gobierno a trata e tema di condicionnan cu gobierno Hulandes ta pone pa stop e recorte di salario gradualmente.

   Diaranson 8 di juni, den un reunion virtual entre Prome Minister Evelyn Wever-Croes y Secretario di Estado Alexandra van Huffelen, a toca e tema di e condicionnan cu Gobierno Hulandes ta pone pa stop e recorte di salario gradualmente. Manera ta conoci caba, siman pasa Secretario di Estado a anuncia cu e paisnan incluyendo Aruba por cuminsa para e recorte cu tin riba salario di empleadonan publico y semi-publico poco poco.

   Durante e reunion, Prome Minister a indica, cu den e presupuesto 2022 tin espacio pa por paga empleadonan publico y semi-publico e 5% riba nan salario back entrante 1 di juli 2022 y entrante 1 di Januari 2023 e 12.6% completo.  Na e momento aki Gobierno ta preparando pa por cumpli cu e condicionnan stipula pa por haci e pago manera acorda.

   Prome Minister a remarca cu e condicionnan adicional cu a worde menciona ta entre otro cu e placa aki mester ta den presupuesto di pais Aruba, cu politiconan mester sigui entrega e 5% y cu e ley Wever-Croes Norm mester worde pasa y mester por drenta na vigor. Na e momentonan aki e ley di Wever-Croes Norm ta na Parlamento. Gobierno ta sperando un contesta di Parlamento riba e fecha pa trata e ley aki.

   “Tanto Parlamento y Gobierno di Aruba ta trahando duro pa nos por logra pa stop e recorte gradualmente y otro luna empleadonan publico y semi publico lo haya nan salario completo bek”, Prome Minister a duna di conoce.