ORANJESTAD (AAN) – Miembronan di Aruba One Happy Island Lions Club a uni forsa cu boluntarionan di Parokia Cristo Rey pa
clasifica y empaketa alimento y productonan di cuido personal destina pa personanan afecta pa e reciente teremoto na Venezuela.
E accion humanitario ta forma parti di e programanan di Hunger Relief y Disaster Relief di Aruba One Happy Island Lions Club, cu tin como meta brinda sosten na personanan y comunidadnan cu ta confronta situacionnan dificil of di emergencia.
Durante e actividad, miembronan di e club y boluntarionan di e parokia a traha hunto pa prepara e donacionnan, asegurando cu e productonan por wordo distribui na e personanan cu tin mas necesidad.
Cu e iniciativa aki, Aruba One Happy Island Lions Club ta reafirma cu cada acto di servicio, maske con chikito e por parce, por trece esperansa, alivio y compasion na personanan cu ta pasa den momentonan dificil.
Presidente di e club, señora Aliyuri Arends a expresa cu colaboracion cu organisacionnan comunitario manera Parokia Cristo Rey ta esencial pa logra yega na mas hende y pa amplia e impacto di e trabou humanitario.
Bou di e lema “Serving with Compassion, Sharing Hope”, e club lo sigui promove solidaridad y servicio, demostrando cu compasion no conoce frontera y cu, trahando hunto, comunidad por brinda speransa na esnan cu tin mas necesidad.
