Aruba One Happy Island Lions Club a haci donacion di un Smart TV na Fundacion Mente y Alma  

ORANJESTAD (AAN): Recientemente, Aruba One Happy Island Lions Club a hasi un donacion di un smart TV na Fundacion Mente y Alma (M&A).

            E entrega di e TV a wordo hasi door di Presidente di Aruba One Happy Island Lions Club, Lion Sra. Carla Martinus na Directora di Fundacion M&A cu ta Sr. Michael Oduber.

            Fundacion Mente & Alma ta trahando pa yuda un doelgroep amplio di persona.

            Nan ta enfoca riba diferente areanan, manera educacion, salud, sostenibilidad y desaroyo comunitario. Nan a realisa hopi proyectonan den pasado, manera cursonan di capacitacion mental y tambe practico, esfuerzonan di sostenibilidad y conocemento tocante areanan financiero, nutricion y temanan manera balor y principio.

            E meta ta pa e participantenan di e diferente cursonan ricibi informacion y guia pa ta un mihor version di nan mes y yuda na un manera sostenibel di crea un mihor sociedad.

            Ta demostra cu na momento cu por duna curso of cualkier instruccion, y tin material grafico, e studiante ta asimila e informacion mihor y ta compronde mihor kico e ta wordo splica. Cu e smart TV e fundacion aki por amplia su forma di duna curso y asina garantiza un product final mihor ainda.

Exito ta Fundacion Mente y Alma cu nan programa.