Danilo Werleman, presidente di ATIA:
ORANJESTAD (AAN)- Presidente di ATIA, señor Danilo Werleman, den entrevista cu DIARIO, a wordo puntra tocante e expectativa di Triple A, cu ya pa 2030 Aruba lo yega na 3 miyon turista. Aruba tin capacidad pa esaki?
“No! Aruba no tin capacidad. Nos no ta kere cu Aruba tin e capacidad aki” Werleman a reitera.
“Nos por wak’e for di aworaki caba. Por ehemplo, den fin di siman mi a core rond un rato, bo ta wak con yen Aruba ta. Tin autonan para na banda di caminda, kiermen nos tin hopi auto riba caminda, nos no tin parkeerplats suficiente pa nan, bo no por core drechi mas riba Aruba. Den camindanan cu ta suppose bo ta core 60, 80, 50 kilometer, bo ta core 20, 30, bo no ta moviendo, kiermen tin hopi cambio cu nos mester haci rapido y atrobe ta ‘no over tourism’.”
“Pero no ta solamente na Aruba, ta na full mundo. Na Spaña nan ta bringando esey cu nan no kier wak mas e turismo eynan. Nos ta na Aruba cu nos kier nos turistanan, nos mester di nan, nan ta nos pilar actualmente, pero nos mester cuid’e si y pone hopi atencion na dje!”, Danilo Werleman, Presidente di ATIA, a reitera
