Un epoca nobo di confrontacion mundial ta manifesta su mes
*Cyber Attack por causa daño enorme na base turistico di pais
*Mundo ta registra atake strategico pa destruccion economico
ORANJESTAD(AAN)—Mientras Merca a yega na un acuerdo cu Ukraine pa sigui duna sosten den e confrontacion entre Ukraine y Rusia, e situacion na Medio Oriente ta empeora y e ambiente di guera, cu dirigentenan mundial ta considera inevitabel, ta bira mas y mas alarmante.
Mientras ta wordo papia di e poderio di armanan cu ta mata hende na lugarnan di confrontacion abierto, DIARIO ta den contacto directo cu contactonan na diferente pais caminda investigacionnan serio ta wordo conduci ariba asuntonan cu no ta haya atencion suficiente den un mundo di cambio grandi.
Ora papia di guera ta papia di confrontacionnan cu mester causa daño na loke ta considera peliger y enemigo.
Analisis di un guera normal ta indica con enemigo na prome lugar ta trata na destrui e basenan importante pa funcionamento di un comunidad.
Ariba e tereno aki mester tene na consideracion loke a pasa siman pasa na e parti Suroeste di Europa, caminda Portugal, Francia y Spaña a haya nan mes den un situacion cu nan a keda completamente sin coriente.
DIARIO imediatamente a opone e prome pensamento cu a wordo lanza cu ta clima y naturaleza a causa e impacto enorme riba bida normal y economia di e paisnan.
Informacionnan cu a sigui drenta a duna DIARIO razon y awor ta investiga e instalacionnan nobo na e paisnan.
Na mes momento cu esaki a tuma lugar, otro informacionnan serio a alcansa DIARIO di Reino uni y na un forma special Inglatera, caminda varios asina yama “Cyber Attacks”a afecta e pais.
Mundo a wordo informa den fin di siman di e atake riba Harrod’s, cu ta uno di e negoshinan mas prestigioso di Londres.
Cu un reputacion enorme cu ta atrae e clase mundial mas halto di consumidor, Harrod’s ta e centro comercial cu ta entrega productonan di mas halto calidad riba tur tereno.
DIARIO den contacto cu su informantenan, a discuti e desaroyo na Londres caminda preocupacion ta wordo lanza pa e forma cu atake di cyber ta afecta directamente e institutonan comercial importante di e pais.
Ta den combersacion cu e red internacional di informantenan experto di DIARIO ta bini dilanti awor un preocupacion serio cu Aruba como pais turistico, sigur mester tene na cuenta.
Un cyber attack realmente ta nifica cu ta uza inteligencia artificial pa destrui metanan economico di un pais.
Aruba a haya un ehempel di cyber attack ora su hospital a wordo ataca y inmobiliza pa perdida di base di informacion importante.
Pa Aruba sigur e atake riba Harrod’s tabata un aviso importante pasobra Harrod’s ta un punto di atraccion pa turismo na Londres pues sigur ta lanza un advertencia na Aruba como centro turistico pa prepara su mes debidamente contra e peliger grandi.
Industria di turismo ta basa riba comunicacion internacional cu un red di informacion cu ta cuminsa for di momento cu ta prepara pa biahenan cu mester entrega na posibel clientenan.
Importancia di bon comunicacion ta presenta su mes riba tur tereno di e entrada y salida di vuelonan, ocupacion di cambernan y horario, inventarionan pa djis mustra riba algun asunto basico.
Informantenan ta mustra cu Aruba mester cuminsa duna publicidad y informacion na e guera mundial nobo cu a cuminsa cu e cyber attacks cu ta aumenta den cantidad y ta amenaza manera ya a wordo bisa, e structura basico di comercio internacional moderno.
DIARIO den su proximo edicionnan lo sigui amplia riba detayes pero manera expertonan ta confirma, no ta permiti pa laga mas tempo pasa sin atende e asunto crucial.
