ORANJESTAD (AAN): Den cuadro di dia internacional di mucha y hoben te cu 17 aña ta bon pa para keto un rato y refleciona unda nos ta awe como pais y kico ta e prioridadnan cu mester fiha.
Sra Jennifer Arends-Reyes como educadora y politico semper a keda vocifera y boga durante añanan pa e derechonan di mucha y hoben worde salbaguardia. Aruba como isla den Caribe ta sumamente dependiente ariba e exito di Turismo y e continuacion pa cu maneho di e siguente fase di e pandemia. Nos muchanan y hobennan cu por cierto ta un grupo sumamente vulnerabel pa cu e efectonan cu e pandemia a trece cun’e.
Tanto ariba nivel social, emocional pero tambe den cuadro di e cumplimento cu e tratado di derechonan di mucha pa tur nos muchanan y hobennan bibando ariba Aruba irespectivo di nan status. Tin hopi aspecto di bienestar pa nos muchanan y hobennan ta mara na e desaroyo economico di nos isla.
E mayornan mester tin un trabao of entrada fiho suficiente pa por cumpli cu e costo di bida, pone pan riba mesa y pa e ta nutritivo, tambe pa por cumpli cu e gastonan basico di utilidad cu ta pa nan hogar tin minimo awa y coriente, pa nan por cumpli cu paña y sapato pa nos muchanan y hobennan. E stabilidad aki pa cu entrada den hogarnan mester percura pa mayornan provee e cuido pa nan yiunan, banda di percura pa nan no sufri ningun tipo di abuso, maltrato of negligencia.
Hopi mayor a depende di pakete di cuminda, Fase, loon subsidie via dunador di trabao y awor ta pasando den un temporada transitorio ainda sumamente dificil. E grupo di 0-17 aña ta representa 21.2% di nos poblacion segun Censo di 2020, e grupo a conoce un caida drastico di 10.9% compara cu 2010. Nos mester percura como isla pa nos muchanan y hobennan ta nos prioridad pa nan bienestar, salud mental y fisico ta salvaguardia. Ningun mucha y hoben mag di pasa hamber of pasa trabao.
Den un pais cu mester ta den desaroyo esaki simplemente ta inaceptabel. Entre otro mayornan, educadornan, trahadornan social y gobernantenan encarga tin e tarea pa percura pa yuda busca un solucion, den casonan cu tin un indicacion di un situacion inusual cu muchanan of hobennan envolvi sra Arends-Reyes ta termina bisando.
