Aruba Marriott Resort & Stellaris Casino ta un universidad den brinda servicio di calidad

Mayoria di e prome asociadonan a forma un carera impresionante

ORANJESTAD (AAN): Aruba Marriott Resort & Stellaris Casino no ta solamente un luga pa traha, pero pa esunnan cu tin mas di 26 aña trahando ey, e ta nan di dos cas. Bintiseis aña pasa Marriott a habri su portanan y awendia e empresa ta nifica hopi p’e empleadonan.

            Hendrick van de Bliek ta un dealer den casino y a surpasa  26 aña trahando cu Marriott, casi un bida trahando pa e mesun compania. Ey el a siña con pa ofrece servicio di un calidad halto y tambe a gana hopi experencia. E kier traha pa hopi mas tempo cu Stellaris Casino. Tanto den su bida personal como pa su famia, Marriott ta nifica hopi. Van de Bliek a sa di combina su trabou cu su cosnan cu e tin di haci. E ta feliz di ta trahando cu nan.

            Angela Zapata ta un supervisor di housekeeping na Marriott y 26 aña pasa cu e hotel a habri su porta, e tabata un di esunnan cu a cuminsa cu nan. Trahando cu nan ta nifica mita di su bida fiel na e mesun marca, e mesun compania. El a gana hopi experencia, pero na mes momento a siña hopi mas ainda. Experencia ta importante pa Zapata, pa motibo asina cu crea un bon experencia pa e cliente, e ta un satisfaccion pa bo. Den tur tempo cu e ta trahando cu Marriott, el a pasa den hopi cos tanto bon como menos bon pero mayoria ta cos bon.

            Su trabou vast na e hotel ta crea un dependencia economico hopi importante. E ta corda cu basta tempo pasa tanto su mama como su yiu tabata depende di dje, mientras e tabata depende di su trabou. Su famia ta apoy’e hopi cu su trabou, incluso ora tabatin evento di trabou, nan tambe ta presente.

            Marisol Díaz ta supervisor di cushina y ta trahando cu e empresa desde su apertura. Esaki ta un logro extraordinario y ta danki n’e sentido di superacion, di avansa den cuestion profesional como familiar. Ta satisfactorio pa motibo cu nan tin stabilidad, tin trabou constante y nan ta un solo famia den e resort aki. Mensahe di Díaz ta pa otro persona uni na nan team pasobra den e empresa aki tin hopi forma di crece y prospera. “Si nos a logra, esun cu kier bin y kier logra, por logra hopi mas di loke ami a logra”, el a expresa na final. 

Empleadonan fiel na Aruba

            E compania ta considera e grupo di 113 empleado, cu a habri e hotel dia 31 di augustus 1995 y cu ta trahando te awe, como nan “charter team”. Na mundo, ora revisa tur e propiedadnan di Marriott, sin duda cu Aruba tin un di e nivelnan di mas halto di trahadonan fiel cu a keda cu e compania desde su apertura. No ta un desaroyo normal, pues e ta bisa algo di e forma con e compania ta trata su empleadonan, e compromiso cu e tin cu nan pa nan bienestar, progreso, educacion y crecemento den e compania. Charter Team di un compania ta e prome ekipo, cu normalmente ta esun cu ta habri e caminda, explora e miho forma di traha, crea protocolnan interno cu despues di 25 aña ainda ta vigente y ta percura pa un servicio sin igual, cu ta sigui atrae huesped pa e hotel.